Tush.UZ - Tushlar tabiri"Hunarmand" uyushmasi tomonidan shu yilning 3-5 may kunlari Buxoroda o‘tkaziladigan II Xalqaro zardo‘zlik va zargarlik festivaliga bag‘ishlangan matbuot anjumani o‘tkazildi, deb xabar qilmoqda "Dunyo" AA muxbiri.
Festivalning asosiy maqsadi xalq amaliy san’atining zardo‘zlik va zargarlik an’analarini rivojlantirish, ularning noyob namunalarini targ‘ib etish, shuningdek, ushbu yo‘nalishlarda o‘zaro tajriba almashish orqali xalqlar o‘rtasida do‘stlik va hamkorlik rishtalarini yanada mustahkamlash, madaniy-gumanitar aloqalarni kuchaytirish, avloddan-avlodga o‘tib kelayotgan kasbiy an’analar va hunarmandchilik maktablarini saqlash va qayta tiklash hamda mintaqaning turizm salohiyatini yanada oshirishdan iborat.
Festival haqida keng ma’lumot tarqatish maqsadida handicrafters.uz sayti ishga tushirildi.
Ma’lum qilinishicha, joriy yil fevral oyida festivalda ishtirok etishni istagan xorijiy davlatlar hunarmandlari, zargarlari, OAV vakillari va boshqalarga ushbu sayt orqali onlayn tarzda ro‘yxatdan o‘tish imkoniyati yaratildi. Onlayn ro‘yxatdan o‘tish yakunlariga ko‘ra, mazkur festivalda 63 ta davlatdan 200 nafarga yaqin ishtirokchi qatnashish istagini bildirdi.
Shuningdek, festivalda respublikamizning barcha hududlaridan 230 nafar hunarmandlar, shulardan 105 nafar zargar, 35 nafar zardo‘z va 90 nafar hunarmandchilikning boshqa yo‘nalishlarida faoliyat olib borayotganlar hisoblanadi.
Xalqaro zardo‘zlik va zargarlik festivali dasturidan ilmiy-amaliy konferensiya, ko‘rik-tanlov, taqdimot va ko‘rgazmalar, teatrlashgan konsert-tomoshalar, madaniy-ma’rifiy va targ‘ibot-tashviqot tadbirlari o‘rin olgan.
Eslatib o‘tamiz, birinchi festival 2022 yilning 21-25 may kunlari Buxoroda bo‘lib o‘tgan edi. Unda respublikamizning barcha viloyatlaridan 300 ga yaqin hunarmandlar, shuningdek, 58 davlatdan 100 dan ortiq xorijiy ishtirokchilar qatnashgan.