Tush.UZ - Tushlar tabiriQozog‘iston rahbari Qasim-Jomart Toqayev Qirg‘iziston Respublikasi Prezidenti Sadir Japarovga І darajali «Dostiq» ordenini topshirdi. Bu haqda Kazinform xabar berdi.
Marosimda Qasim-Jomart Toqayev Sadir Japarov ikki tomonlama munosabatlarni rivojlantirish va mustahkamlashga katta hissa qo‘shayotganini ta’kidladi.
“Qirg‘iziston bizning azaldan qardoshimiz. Bizning eng yaqin va ishonchli strategik hamkorimiz. Ikki xalqning qardoshligi o‘zaro manfaatli munosabatlarning oltin halqasidir. Siz bu ishga katta hissa qo‘shmoqdasiz. Men buni yuksak qadrlayman”, – dedi QR Prezidenti.
Davlat rahbarining so‘zlariga ko‘ra, Qozog‘iston Qirg‘iziston bilan strategik sheriklik va ittifoqchilikka asoslangan hamkorlikni mustahkamlashdan manfaatdor.
“Xalqlarimiz o‘rtasidagi o‘zaro manfaatli munosabatlarni mustahkamlashga katta hissa qo‘shdingiz. Shuni hisobga olib, sizni І darajali «Dostiq» ordeni bilan taqdirlashga qaror qildim. Bu alohida hurmat va samimiy minnatdorlik belgisidir. Ishonchim komilki, ushbu mukofot ikki davlat o‘rtasidagi munosabatlarni yanada rivojlantirishga xizmat qiladi. Qozog‘iston va Qirg‘iziston do‘stligi abadiy davom etsin!” – dedi Davlat rahbari.
Sadir Japarov Qasim-Jomart Toqayevga samimiy minnatdorlik bildirib, ikki davlat o‘rtasidagi strategik sheriklik va ittifoqchilik munosabatlarini yanada mustahkamlash uchun barcha sa’y-harakatlarini qilishga tayyorligini ma’lum qildi.