Tush.UZ - Tushlar tabiriVenesuelaning neft va gaz sektoriga qarshi AQSH sanksiyalari tiklanganiga qaramay, mamlakat neft sanoati rivojlanadi. Bu haqda 18-aprel kuni Venesuela prezidenti Nikolas Maduro ma’lum qildi.
Na blokada, na sanksiyalar, na litsenziyalar Venesuela nefti, gazi va Venesuela neft-kimyo sanoatini ishlab chiqarishni to‘xtata oladi, — dedi Maduro.
Uning fikricha, yetti yil ichida Venesuela rivojlanib, jahon energiya bozorida asosiy ishlab chiqaruvchilardan biriga aylanadi.
PDVSA (davlat neft va gaz kompaniyasi) rivojlanish, o‘sish uchun litsenziyaga muhtoj emas va hech kim bizning asosiy energetika sohamiz o‘sishini to‘xtata olmaydi, — dedi Maduro AQSHning 44-sonli Bosh litsenziyani yangilamaslik haqidagi qaroriga ishora qilib.
Prezidentning ta’kidlashicha, Qo‘shma Shtatlar roppa-rosa bir yil oldin Venesuela hukumati bilan to‘g‘ridan to‘g‘ri, norasmiy, yashirin muzokaralar boshlashni talab qilgan. Qatar, Italiya va Meksikada bo‘lib o‘tgan yetti raund muzokaralar davomida diplomatik munosabatlarni tiklash, migratsiya masalalari va sanksiyalarni bekor qilish masalalari muhokama qilingan.
Maduro Venesuela AQSH bilan tuzilgan kelishuvlarning barcha bandlarini bajarganini ta’kidlagan. Vashington Venesuela jamiyati va iqtisodiyotiga qarshi barcha jinoiy sanksiyalarni bekor qilish haqidagi kelishuvni bajarmagan.
Avvalroq AQSH Venesuelaning neft va gaz sektoriga qarshi sanksiyalarni yengillashtiradigan 44-sonli Bosh litsenziyani uzaytirmaslikka qaror qilgan edi. AQSHga ko‘ra, Maduro hukumati radikal muxolifatni birlashtirgan Venesuela Unitar platformasi bilan 2023-yil oktyabr oyida Barbadosda tuzilgan kelishuv bo‘yicha baʼzi majburiyatlarini bajarmagan. Bu kelishuv 2024-yilda prezidentlik saylovlarini o‘tkazishga tegishli.