Tush.UZ - Tushlar tabiriSaudiya Arabistoni mezbonlik qilayotgan qilichbozlik bo‘yicha o‘smirlar va yoshlar o‘rtasidagi jahon chempionatining navbatdagi kuni O‘zbekiston terma jamoasi uchun yuqori notada tugadi. O‘smirlar toifasida qatnashgan sablyachilarimiz bugungi bahslarni bittadan oltin, kumush va bronza medallari bilan yakunlashdi.
Qayd etish joiz, yigitlar o‘rtasidagi finalda ikki nafar hamyurtimiz Sardor Abdukarimov va Alpamis Urakbayev chempionlik uchun jang qilishdi. O‘ziga xos «o‘zbekcha duel»da Sardor 15:14 hisobida g‘alaba qozondi. Shu tariqa Abdukarimov oltin, Urakbayev esa kumush medalga sazovor bo‘ldi.
Qizlar o‘rtasida kechgan bahslarda esa yarim finalgacha yetib borgan Nargiza Jaksibayeva bronza medali bilan taqdirlandi. Ahamiyatlisi, Jaksibayeva o‘tgan yili Bolgariyada o‘tgan dunyo birinchiligida ham shohsupaning uchinchi pog‘onasidan joy olgan edi.