Tush.UZ - Tushlar tabiriQashqadaryo viloyati, Shahrisabz shahrida fuqaro farzandi vafot etganini aytgan shifokorga musht tushirdi. Bu haqda Millar ko‘rsatuvi lavhasida ma’lum qilindi.
Qayd qilinishicha, 2 yoshli bola divandan yiqilib, Shahrisabz shahri bolalar shifoxonasiga yotqizilgan. Bolaning bosh miyasiga qon quyilgani sababli reanimatsiya bo‘limiga o‘tkazilib, sun’iy nafas apparatiga ulangan. 17 aprel kuni bolada biologik o‘lim kuzatilgan. Buni eshitgan bolaning otasi esa shifokorga musht tushirgan.
Kaltaklangan shifokor 47 yoshli jarroh ekani ta’kidlanmoqda. Unga bosh chanog‘ining yopiq shikasti, boshmiya chayqalishi, chap ko‘z qovoqlari yumshoq to‘qimalarining lat yeyishi tashxisi qo‘yilgan. U hozir davolanmoqda.
Kaltaklangan shifokor farzandini yo‘qotgan ota-onaga hozir juda qiyin ekanini, shu bois holat bo‘yicha huquqni muhofaza qilish organlariga murojaat qilmaganini aytgan.
Shu sababli tekshiruv harakatlari boshlanmagan, ammo holat Qashqadaryo viloyati IIB nazorati ostida, deyiladi lavhada.