Tush.UZ - Tushlar tabiriPoytaxtimizda Bolalar va oilalarni qo‘llab-quvvatlash Assosiasiyasining navbatdagi yig‘ilishi bo‘lib o‘tdi.
Tadbirda Bolalar va oilalarni qo‘llab-quvvatlash Assosiasiyasi raisi Inqilob Yusupova, Assosiasiyaning Qoraqalpog‘iston Respublikasi, Toshkent shahri va viloyatlar bo‘limlari raislari va vakillari ishtirok etdi.
Tadbirda so‘nggi yillarda mamlakatimizda inson qadrini yuksaltirish, bolalar va oilalarni qo‘llab-quvvatlash borasida amalga oshirilayotgan davlat siyosati mohiyatini aholi o‘rtasida keng targ‘ib etish, bolalar va oilalar huquqlarini asrash bo‘yicha xalqaro normalar asosida amalga oshirilayotgan ishlar e’tirof etildi.
Yig‘ilishda Assosiasiyada bolalar va oilalar huquqlarini muhofaza qilish borasida amalga oshirilgan ishlar, kelgusidagi rejalar muhokama qilindi va bir qator tashkiliy masalalar ko‘rib chiqildi. O‘zbekiston Respublikasi Oliy Majlisida Inson huquqlari bo‘yicha vakil(ombudsman) o‘rinbosari, Bolalar huquqlari bo‘yicha vakil bo‘lib faoliyat yuritgan Aliya Tuygunovna Yunusova Bolalar va oilalarni qo‘llab-quvvatlash assosiasiyasiga ijrochi direktor etib tayinlandi.
— Mamlakatimizda Prezidentimiz Shavkat Mirziyoyev tashabbusi bilan yosh avlodni ilmli, salohiyatli qilib tarbiyalash, xalqimizni ijtimoiy himoya qilish davlat siyosatining ustuvor yo‘nalishlaridan biriga aylandi, — deydi Bolalar va Oilalarni qo‘llab quvvatlash assosiasiyasi raisi Inqilob Yusupova. — Mamlakatimizda ijtimoiy adolat tamoyillari yo‘lga qo‘yildi, bolalar va oilalar huquqlari O‘zbekiston Respublikasi Qonunlari bilan himoya qilinishi belgilangan. Ayniqsa, bolalarning huquqlari, erkinliklari va qonuniy manfaatlarini himoya qilishga alohida e’tibor qaratilmoqda. Bugun bizning oldimizda davlat va jamoat tashkilotlari bilan hamkorlikda xalqaro normalar asosida davlatimiz tomonidan belgilangan Qonunchilik ijrosini ta’minlash, bu boradagi davlat siyosati mohiyatini keng aholi o‘rtasida targ‘ib etish, xalqimizning huquqiy savodxonligini yuksaltirib, farzandlarimizning ahil va totuv oilalarda, ilmli-salohiyatli bo‘lib voyaga yetishini ta’minlashdek mas’uliyatli vazifalar turibdi.
O‘zbekiston Respublikasida bolalar huquqlari, erkinliklari va qonuniy manfaatlarini ishonchli himoya qilishning institusional va huquqiy asoslari, bolalar orasida nazoratsizlik va huquqbuzarliklar sodir etilishining barvaqt oldini olish, nogironligi bo‘lgan bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlash masalalari yuzasidan Bolalar va oilalarni qo‘llab-quvvatlash assosiasiyasi tomonidan rejalashtirilayotgan muhim loyihalar muhokama qilindi.