Tush.UZ - Tushlar tabiriRossiya Federatsiyasi Tergov qo‘mitasi mudofaa vaziri o‘rinbosari Timur Ivanovning qo‘lga olinganini e’lon qildi. Departament 23 aprel, seshanba kuni ma’lum qilishicha, amaldor pora olganlikda gumon qilinmoqda. «Tegishli tergov harakatlari olib borilmoqda», dedi Rossiya Tergov qo‘mitasi rasmiy vakili Svetlana Petrenko. Boshqarma boshqa tafsilotlarni keltirmadi.
Shoyguning o‘rinbosari 15 yilga ozodlikdan mahrum etilishi mumkin
TASSning huquq-tartibot idoralariga tayanib xabar berishicha, tergov Ivanov hibsga olinishiga erishishga harakat qiladi. Rossiya Federatsiyasi mudofaa vaziri Sergey Shoyguning o‘rinbosari kamida 1 million rubl pora olganlikda gumon qilinmoqda, uni 15 yilgacha qamoq jazosi kutmoqda, deb yozadi agentlik. O‘z navbatida, Kreml matbuot kotibi Dmitriy Peskov Rossiya prezidenti Vladimir Putin Mudofaa vazirligi rahbari o‘rinbosarining qo‘lga olingani haqida xabardor qilinganini aytdi.
«Mediazona» ta’kidlashicha, Ivanov yirik qurilish loyihalariga mas’ul. Xususan, uning rahbarligida Rossiya Qurolli kuchlarining bosh ibodatxonasi, Moskva yaqinidagi «Patriot» bog‘i, Kamchatkadagi suvosti kemalari bazalari va «Vostochniy» kosmodromi qurildi, qo‘lga olinishidan oldin u Rossiya tomonidan vayron qilingan Mariupolni tiklash loyihalarini boshqargan. Bundan tashqari, 2016 yildan buyon Mudofaa vazirligi rahbari o‘rinbosari lavozimida ishlab kelgan Ivanov mulkni boshqarish, qo‘shinlarni joylashtirish, uy-joy va tibbiy yordamni tashkil etish bilan shug‘ullangan, deb ta’kidlaydi TASS.
2022 yil dekabr oyida Aleksey Navalniyning tarafdorlari Timur Ivanov va uning rafiqasi Svetlana Zaxarova haqida katta surishtiruvni e’lon qildi. Ularning ma’lumotlariga ko‘ra, 2010-2018 yillarda er-xotin har yozda Lojuvard sohilida villalarni ijaraga olgan va Sen-Tropeda uy-joy ijarasi uchun kamida 850 ming yevro sarflagan. Ivanov Mudofaa vazirligining qurilish kompaniyalari pudratchilaridan pul olgan, 2022 yil iyun oyida u Yevropa Ittifoqining sanksiyalari ostida qolmaslik uchun xotini bilan ajrashdi, ayol Rossiya Federatsiyasining Ukrainaga qarshi urushi to‘liq miqyosda boshlanganidan keyin ham sayohatlarini davom ettirgan, deyiladi surishtiruvda.