Tush.UZ - Tushlar tabiriO‘zbekiston elchixonasida Navro‘z bayrami va diplomatik missiya ochilganining bir yilligiga bag‘ishlagan tadbir tashkil etildi, deb xabar beradi "Dunyo" AA muxbiri.
Unda Vengriya rasmiy, ijtimoiy-siyosiy, diplomatik, ekspert-tahlil, biznes va ilmiy-akademik doira vakillari, shuningdek, vatandoshlar ishtirok etdi.
O‘zbekiston elchisi Oybek Shaxavdinov yig‘ilganlarga mamlakatimizda so‘nggi yillarda erishilgan yutuqlar, respublikadagi turizm va investisiya imkoniyatlari haqida ma’lumot berdi. Biznes bilan shug‘ullanish, xorijiy investorlar va sayyohlar uchun yaratilgan qulay shart-sharoitlarga urg‘u berildi.
O‘zbekiston va Vengriya rahbarlarining siyosiy irodasi tufayli mamlakatlarimiz va xalqlarimiz o‘rtasida strategik sheriklik ruhidagi munosabatlar mustahkamlangani qayd etildi. Shuningdek, iqtisodiyot, investisiyalar va turizm sohalarida ikki tomonlama hamkorlikni yanada rivojlantirish uchun katta imkoniyatlar mavjudligi bildirildi.
Tadbirning madaniy qismida "Nihol" mukofoti sovrindorlari Hulkar Abdullayeva va Voxidjon Isoqov ishtirokida konsert dasturi namoyish etildi.
Vengriyaning "Turon" jamg‘armasi prezidenti Andrash Biro:
– O‘zbekistonning Budapeshtdagi elchixonasi ochilganining bir yilligi bilan o‘zbek tomonini tabriklayman. Bugungi tadbir juda qiziqarli tarzda o‘tdi va hamkorlik istiqbollari uchun poydevor bo‘ldi. Yana bir marta barcha o‘zbek birodarlarimizni samimiy qutlayman.
"Haris Travel Club" sayyohlik agentligi boshqaruvchi direktori Rixard Xaris:
– Ushbu imkoniyatdan foydalanib, O‘zbekiston elchixonasiga Navro‘z bayrami va diplomatik missiya ochilganining bir yilligiga bag‘ishlangan tadbirda ishtirok etish taklifi uchun minnatdorlik bildiraman. O‘zbekistonning boy madaniy-tarixiy merosi va turizm salohiyati haqidagi ma’lumotlarni qiziqish bilan tingladim.
Vengriya tashqi ishlar va savdo institutining katta ilmiy xodimi Shandor Sheremet:
– O‘zbek xalqining eng muhim bayramlaridan biri — Navro‘zi olam tantanalarida ishtirok etish men uchun katta sharaf. Bu yil Navro‘z bayrami O‘zbekistonning Vengriyadagi elchixonasi tashkil etilganining bir yilligiga to‘g‘ri kelgani, ayniqsa quvonarlidir.
Etvosh Lorand universitetida doktoranti Hilola O‘rolova:
– Men Vengriyaning eng nufuzli universitetlaridan biri – Etvosh Lorand universitetida doktorantura bosqichida o‘qiyapman. Ushbu dastur o‘zbekistonlik yosh olimlarga Vengriya universitetlarida o‘qish imkoniyatini taqdim qildi. O‘qish davomida kerakli kasbni egallash va kasbiy mahoratimizni oshirib baryapmiz. Bularning barchasi O‘zbekiston va Vengriya o‘rtasida tez rivojlanayotgan do‘stlik va konstruktiv hamkorlik tufayli amalga oshdi.
Budapesht texnika va iqtisodiyot fanlari universiteti talabasi Javohir Norqulov:
– Bugun O‘zbekiston elchixonasida Navro‘z bayrami va diplomatik vakolatxona tashkil etilganining bir yilligi munosabati bilan bo‘lib o‘tgan tadbirda qatnashdik. Ushbu mamlakatdagi O‘zbekiston yoshlari tadbirda faol ishtirok etishdi. Fursatdan foydalanib, xorijda tahsil olayotgan vatandoshlarni har tomonlama qo‘llab-quvvatlayotgan O‘zbekiston hukumatiga barcha tengdoshlarim nomidan minnatdorlik bildiraman.