Tush.UZ - Tushlar tabiriOliy ta’lim, fan va innovasiyalar vazirligi, O‘zbekiston logistika assosiasiyasi, Eksport va logistika akademiyasi hamda Germaniya xalqaro hamkorlik jamiyati (GIZ) bilan hamkorlikda “Markaziy Osiyoda iqtisodiy o‘sish tarmoqlari uchun professional ta’lim (PECA)” loyihasi doirasida “Logistika sohasida malakali o‘rta bo‘g‘in kadrlarni tayyorlash” mavzusida uchrashuv bo‘lib o‘tdi.
Unda vazirlik Professional ta’lim tizimini rivojlantirish departamenti boshlig‘i O‘tkir Alijonov o‘z taqdimoti bilan ishtirok etib, professional ta’lim muassasalari va ish beruvchilarning o‘zaro integrasiyasini ta’minlash, ish beruvchilar ehtiyoji asosida dual ta’limni tashkil etish, o‘quvchilar amaliyotlarini samarali yo‘lga qo‘yish va bitiruvchilar bandligini ta’minlash haqida ma’ruza qildi.
Shuningdek, uchrashuv davomida logistika sohasida milliy kadrlar malakasini oshirish va qayta tayyorlash, bir-biriga maslahat xizmatlarini ko‘rsatish, logistika xizmatlari sohasida hamkorlikda tadqiqotlar olib borish, konferensiyalar, seminarlar o‘tkazish, amaliyot va o‘quv seminarlari tashkil etish masalalari bo‘yicha o‘zaro fikr almashilib, kelgusidagi istiqbolli rejalar belgilab olindi.
Shu bilan birga, O‘zbekiston logistika assosiasiyasi, Toshkent avtomobil va yo‘llar texnikumi va “Multimodal Trans Terminal” MCHJ tomonidan “Milliy kadrlarni kasbiy tayyorlash to‘g‘risida” shartnoma imzolandi.
Undan Toshkent avtomobil va yo‘llar texnikumida transport va ombor logistikasi sohasida ish beruvchilar bilan hamkorlikda o‘rta bo‘g‘in kadrlar tayyorlash va ularning bandligini ta’minlash hamda soha vakillari malakasini oshirish kabi masalalar o‘rin olgan.
Bundan tashqari, “Avtotransport logistikasi” va “Ombor logistikasi” mutaxassisliklari bo‘yicha soha talablari, o‘quv rejalari va dasturlarini birgalikda ishlab chiqish va amalga oshirish, logistika markazlarida texnikum o‘quvchilari uchun o‘quv va amaliy mashg‘ulotlarni birgalikda o‘tkazish, texnikum bitiruvchilarining malaka imtihonlari ish beruvchilar tomonidan baholanishi nazarda tutilgan.