Tush.UZ - Tushlar tabiriMamlakatimizning 8 ta hududi, jumladan, Toshkent shahri, Namangan, Toshkent, Andijon, Farg‘ona, Navoiy, Sirdaryo va Jizzax viloyatlarida mahalliy tabiiy-iqtisodiy salohiyatdan samarali foydalanish, istiqbolli loyihalarni amalga oshirish hisobiga yalpi hududiy mahsulotning jadal o‘sishi ta’minlandi.
Makroiqtisodiy va hududiy tadqiqotlar instituti loyiha rahbari Elnora Yakubova pandemiyadan keyingi davrda Andijon, Buxoro, Samarqand, Sirdaryo, Toshkent viloyatlarida qisqa muddatda iqtisodiy rivojlanishda barqarorlik ta’minlanganini ta’kidladi.
– Xususan, Andijon, Navoiy, Sirdaryo viloyatlarida YAHM o‘sishini ta’minlashda sanoat sektori sezilarli ahamiyatga ega bo‘ldi. Qoraqalpog‘iston Respublikasi, Qashqadaryo, Samarqand, Surxondaryo, Buxoro viloyatlari hamda Toshkent shahrida YAHM o‘sishini ta’minlashda xizmat ko‘rsatish sohasi yetakchi tarmoq sifatida qayd etildi. YAIMning aholi jon boshiga to‘g‘ri keladigan hajmi 2023 yilda 29,3 million so‘mni tashkil etib, iqtisodiy rivojlangan hududlarning mavqei mustahkamlandi. Bu Navoiy, Toshkent viloyatlari va Toshkent shahri hamda respublika ko‘rsatkichlari o‘rtasidagi farq oshganligida namoyon bo‘ldi. 2017-2023 yillarda mamlakatning iqtisodiy rivojlangan hududlarini hisobga olmagan holda, 6 ta hududda (Andijon, Buxoro, Jizzax, Namangan, Sirdaryo, Xorazm viloyatlari) YAHMning aholi jon boshiga to‘g‘ri keladigan ulushi o‘rtacha respublika ko‘rsatkichiga (Toshkent shahri, Navoiy va Toshkent viloyatlari bundan mustasno) yaqinlashdi, – dedi E.Yakubova.
Ta’kidlash kerakki, “O‘zbekiston – 2030” strategiyasida «drayver» sohalarni rivojlantirish va hududlar salohiyatidan to‘liq foydalanish ko‘zda tutilgan. 2030 yilga qadar iqtisodiyot hajmini 2 barobar oshirish va «daromadi o‘rtachadan yuqori bo‘lgan davlatlar» qatoriga kirish rejalashtirilgan. Bunda asosan hududlarni ijtimoiy-iqtisodiy jihatdan kompleks rivojlantirishga e’tibor qaratiladi.