Tush.UZ - Tushlar tabiriRadikal mafkurani ulug‘lash va ksenofobiyani kuchaytirish maqsadida xalqaro beqarorlikdan foydalanmoqchi bo‘lganlarning harakatlari yaqqol ko‘zga tashlanadi. Bu haqda Davlat rahbari Qasim-Jomart Toqayev “Birlik. Yangilanish. Taraqqiyot” mavzusida o‘tkazilayotgan Qozog‘iston xalqi Assambleyasining XXXІІІ sessiyasida ma’lum qildi.
“Biz global kataklizm avj olayotganiga, turli davlatlar o‘rtasida harbiy-siyosiy, savdo-iqtisodiy, hattoki madaniy-gumanitar mojarolar kuchayib borayotganiga guvoh bo‘lmoqdamiz. Xalqaro beqarorlikdan foydalanib, radikal mafkurani ulug‘lash, ksenofobiyani qo‘zg‘atmoqchi bo‘lganlarning qilmishlari yaqqol ko‘zga tashlanadi. Ayrim davlatlarning geostrategik ambisiyalariga etnik-diniy asos topishga urinayotganlar, hattoki buni sivilizasiyalararo mojaro sifatida ko‘rsatmoqchi bo‘lganlar baland ovozda gapira boshladi. Buning natijasida dunyoning turli burchaklarida turli ekstremistik kuchlarning faolligi kuchayib borayotganini ko‘rish mumkin”, – dedi Prezident.
Davlat rahbari terrorchilik tahdidlari yana bir bor kun tartibiga chiqqaniga e’tibor qaratdi.
“Yaqinda Moskva yaqinidagi terrorchilik hodisasi qalbimizga qattiq ta’sir qildi. Ko‘plab fuqarolar fojia qurbonlariga hamdardlik va tilaklar bildirishdi, Rossiyaning Qozog‘istondagi elchixonasi va konsulligi binolari oldiga gul qo‘yishdi. Bunday manzaraga dunyoning deyarli barcha davlatlari guvoh bo‘ldi. Qozog‘iston xalqaro huquq va insonparvarlik g‘oyalariga qat’iy amal qiladigan davlat sifatida birinchilardan bo‘lib Birlashgan Millatlar Tashkilotiga a’zo davlatlarni tinch aholiga nisbatan sodir etilgan dahshatli vahshiy harakatni qoralashga chaqirdi. O‘zaro muloqotni yo‘lga qo‘yish va kuchlarni birlashtirish orqaligina butun insoniyat xalqaro munosabatlar sohasidagi tanazzul va parchalanish jarayonlariga qarshi tura oladi”, – dedi Qasim-Jomart Toqayev.