“Roma” o‘yini ochilib ketgan Shomurodovni qaytaradimi?

Yaqinlashib kelayotgan yozgi transferlarning eng dolzarb mavzularidan biri Eldor Shomurodovning faoliyatini qaysi jamoada davom ettirishi bo‘ladi.

Ma’lumki, 28 yoshli hujumchi aslida “Roma”ga tegishli. Uning rimliklar bilan 2026 yilning yoziga qadar davom etadigan shartnomasi bor. Joriy mavsumni “Kalyari”da ijarada o‘tkazmoqda.

Sardiniya klubida o‘zbek legionerini yana 9 million yevro to‘lab, to‘liq o‘z futbolchisiga aylantirish huquqi bor.

“Kalyari” mutasaddilari birdaniga o‘yini kuchaygan, gollari va assistlari bilan jamoani xavfli hududdan uzoqlashtirishga katta hissa qo‘shgan Eldor Shomurodovni o‘z safida olib qolmoqchi.

Xo‘sh, o‘yinchiga egalik qiluvchi “Roma”ning bu masalada pozitsiyasi qanday? Bu savolga “Roma” faoliyatini yoritib kelayotgan ilromanista.it sayti eksperti Anjelo Chiarletta javob izladi.

- Rim klubi Yevropa Chempionlar ligasiga yo‘llanma olish uchun kurashmoqda. Bu maqsadga erishish uchun A Seriyada kuchli to‘rtlikka kirish yoki Yevropa Ligasida g‘olib chiqish kerak.

“Roma” milliy chempionatda beshinchi o‘rinda bormoqda va hozircha kuchli beshlikka kira olgani yo‘q. Lekin “bo‘rilar” Yevropa Ligasida yarim finalga chiqqan.

Jamoani yaqinda qabul qilib olgan Daniele De Rossi o‘ziga moslashi tabiiy. Birinchi navbatda, Joze Mourino olib kelgan o‘yinchilar o‘rniga boshqa ijrochilar olib kelinadi.

“Roma” Shomurodovning umumiy 10 million yevrolik transferini “Kalyari” bilan o‘tgan yoz kelishib bo‘lgan. Biroq bir necha oy muqaddam bu transferni amalga oshishi ehtimoldan juda yiroq edi.

Endi bu kelishuvni oxiriga yetkazish imkoni tug‘ildi. Shomurodovning ko‘rsatkichlari keskin o‘sishi ortidan “Kalyari” ham musobaqa jadvalida yuqorilashga erishdi.

Sal avval o‘zbek legionerining Rimga qaytishi masalasi kun tartibiga qo‘yilgan edi. Hozir esa, sardiniyaliklar futbolchini o‘z safida olib qolish harakatini boshladi.

“Kalyari” sport direktori Nereo Bonato Shomurodov uchun belgilangan umumiy 10 million yevrolik summani pasaytirishga urinmoqda.

Biroq, bu transfer o‘xshamagan taqdirda ham, “Roma” Eldorni jamoada olib qolmaydi. Shomurodov yozgi transferlar vaqtida baribir o‘ziga yangi ish joyi topishiga to‘g‘ri keladi, - deb yozmoqda ilromanista.it sayti eksperti Anjelo Chiarletta.

Eslatib o‘tamiz, O‘zbekiston milliy terma jamoasi sardori va eng zo‘r to‘purari hisoblangan Shomurodov 2020 yildan beri A Seriyada o‘ynab keladi. Hozirga qadar, hamyurtimiz “Jenoa”, “Roma”, “Spetsiya” va “Kalyari” jamoalarida to‘p tepgan.

Eldor “Roma” safida UYEFA Konferensiyalar kubogi g‘olibi bo‘lgan. Bu uning Yevropada qo‘lga kiritgan yagona sovrini hisoblanadi.
Joylangan vaqt : (26 Aprel 2024 00:00)

Manba: www.zamin.uz