Morxo‘r bolasi asrab qolindi

Surxondaryo viloyatidagi Ko‘hitang tog‘ tizmalarida yoqqan kuchli yomg‘ir tug‘ilganiga taxminan ikki-uch kun bo‘lgan O‘zbekiston Respublikasi “Qizil kitobi”ga kiritilgan morxo‘r bolasini onasidan ajratib tashlaydi.

“Surxon” davlat qo‘riqxonasi “Qizilolma” bo‘limini ko‘zdan kechirayotgan nazoratchi Tog‘aymurod Abdulaliyev soyda nochor ahvolda unga duch kelib, birinchi yordam ko‘rsatadi, morxo‘r bolasining hayotini saqlab qoladi.

Ekologiya, atrof-muhit muhofazasi va iqlim o‘zgarishi boshqarmasi axborot xizmatining xabar qilishicha, kuchli yomg‘irda onasidan ajralib qolgan morxo‘r bolasi zudlik bilan veterinar ko‘rigidan o‘tkazilib, tegishli hujjatlar rasmiylashtirilgach, Buxoro ixtisoslashtirilgan Jayron pitomnigiga parvarish qilish uchun jo‘natilgan.

Ma’lumotlarga ko‘ra, ayni paytda viloyatdagi “Surxon” davlat qo‘riqxonasida 700 boshdan ortiq morxo‘r mavjud.

Joylangan vaqt : (26 Aprel 2024 09:00)

Manba: www.aniq.uz