Tush.UZ - Tushlar tabiriIsroil armiyasining G‘azo sektori janubidagi Xon Yunus shaharchasidan olib chiqib ketilishi ortidan Nosir kasalxonasi hududidagi uchta ommaviy qabrdan topilgan jasadlar soni 392 nafarga etdi.
Xon Yunus fuqarolik mudofaasi bo‘limi direktori Yamin Abu Sulaymon matbuot anjumanida Nosir kasalxonasi hududidagi ommaviy qabrlardan qidiruv ishlari davomida yana 58 kishining jasadi topilganini aytdi.
“Nosir kasalxonasi hududida 392 ta jasad bo‘lgan 3 ta ommaviy qabr topildi. Ba’zi jasadlarda qiynoqlar va qatl izlari bor edi. Bizning taxminimizcha, ularning ba’zilari tiriklayin ko‘milgan”, - dedi Abu Sulaymon.
Abu Sulaymonning qo‘shimcha qilishicha, qidiruv tadbirlari davomida bolalarning jasadlariga ham duch kelingan. “Kasalxona hududidagi ommaviy qabrlarda bolalar jasadlari topilgani sababini hozircha bilmaymiz”.
“Isroil askarlari ko‘plab jasadlarni polietilen paketlarga solib, kasalxona hududida 3 metr chuqurlikka ko‘mgan. Bu parchalanish jarayonini tezlashtirgan va natijada 165 jasadning shaxsini aniqlashning imkoni bo‘lmadi”, - dedi u.
Abu Sulaymon xalqaro hamjamiyatni “inson huquqlari tashkilotlari va xalqaro ommaviy axborot vositalariga Isroilning Falastin xalqiga qarshi jinoyatlarini fosh qilish uchun hududga kirishiga ruxsat olishga” chaqirdi.
Fuqarolik mudofaasi guruhidan Muhammad Mugayr matbuotga Isroil harbiylari tomonidan o‘ldirilganlarning plastik kishanlar bilan bog‘langan jasadlari va qiynoqlar izlari aks etgan videoni taqdim etdi.
Uning so‘zlariga ko‘ra, Nosir kasalxonasida topilgan jasadlar qiynoqlar va qatllarga uchragan degan shubhani uyg‘otadi.
Topilgan jasadlarning Falastin xalqi tomonidan ko‘milgan bo‘lishi mumkin emasligiga diqqat qaratgan Mugayr, jasadlarni tuproqning 3 metr chuqurlikda ko‘milishi g‘azoliklar tomonidan qabul qilingan dafn qilish usullariga zid ekanligini qayd etdi.
Isroil armiyasi uzoq vaqt qamalda bo‘lgan Xon Yunusdagi Nosir kasalxonasini butunlay ishdan chiqardi. Jumladan, 15 fevral kuni uning hududida maxsus reyd o‘tkazdi. 24 mart kuni ham Isroil askarlari yana kasalxonani qurshab olib, ko‘chirilgan ko‘plab falastinliklar va tibbiyot xodimlarini hibsga oldi. 4 oylik ishg‘oldan so‘ng nihoyat 7 aprel kuni Xon Yunusdan chekindi. Qo‘shinlar olib chiqilgach, shaharda ommaviy qabrlar topildi, uylar vayronalari va yo‘l chetlaridan jasadlar yig‘ila boshlandi.