Tush.UZ - Tushlar tabiriFutbol bo‘yicha U-23 Osiyo Kubogi chorak finalida O‘zbekiston va Saudiya Arabistoni o‘zaro to‘qnash keladi.
Uchrashuv oldidan O‘zbekiston U-23 terma jamoasi bosh murabbiyi Timur Kapadze hamda futbolchi Jasurbek Jaloliddinov ishtirokida matbuot anjumani tashkil etildi.
Ushbu bosqichga yetib kelganimizdan xursandmiz. Ertaga bizni muhim o‘yin kutib turibdi va biz o‘yinga tayyormiz.
Raqib haqida
Albatta raqibimiz o‘ziga yarasha kuchli jamoa. Bu jamoa bilan ko‘p o‘ynaganmiz. Jamoa va uning murabbiyi imkoniyatlari haqida bilamiz. Biroq biz ham o‘z strategiyamiz va rejamiz bo‘yicha harakatlanamiz.
2 yil avvalgi Saudiya Arabistoni haqida
2 yil ichida har ikkala jamoa ham o‘zgardi, deb o‘ylayman. O‘z o‘rnida biz ham o‘sishga erisha oldik, tajriba to‘pladik. Ertaga o‘z rejamiz asosida harakatlanib, g‘alaba qozonmoqchimiz.
Legionerlarning moslashuvi haqida
Ular tarkibimizga yetib kelganidan xursandmiz. Legionerlarimiz bizga qo‘shimcha kuch berishdi. Allaqachon moslashib ulgirishdi. Ular hatto o‘tgan uchrashuvda ham maydonga tushishdi. Ertaga esa, ko‘ramiz, kim tayyor bo‘lsa, o‘sha maydonga tushadi.
Timur Kapadze, O‘zbekiston OTJ ustozi
Ertaga oldimizda muhim uchrashuv bor. Biz o‘yinga tayyormiz.
Tayyorgarlik haqida
Bu musobaqaga uzoq muddat tayyorgarlik ko‘rdik. Yildan yilga o‘z o‘yinimizni shakllantirib, o‘sishga erishdik. Hozirda hech qanday bosimni his qilmayapmiz. Bor e’tiborimiz ertangi o‘yinga qaratilgan.
Futzal terma jamoamizning g‘alabasi haqida
Albatta bundan juda ham xursandmiz. Futzalchilarimiz ham biz ham bir jamoamiz va xalqimizni g‘alaba bilan xursand qilishni maqsad qilganmiz. Ertangi o‘yinda ularga ham omad tilayman.
Ertangi o‘yindagi muxlislik haqida
Biz xalqimizning qo‘llab-quvvatlashini his qilib turibmiz. Ular g‘alabamiz uchun duoda bo‘lishmoqda. Ertangi o‘yinda raqib jamoa muxlislari ko‘p bo‘lishi bizga bosim bermaydi, bor e’tiborimizni g‘alaba qozonishga qaratamiz.
Jasurbek Jaloliddinov, O‘zbekiston U-23 terma jamoasi futbolchisi
O‘zbekiston U-23 terma jamoasining Saudiya Arabistoniga qarshi o‘yini 26-aprel kuni 19:00 da start oladi.