Tush.UZ - Tushlar tabiriG‘azo janubida Isroil havo hujumi oqibatida halok bo‘lgan ona qornidan qutqarilgan chaqaloq 25-aprel kuni halok bo‘ldi. Bu haqda BBC nashri xabar berdi.
Manbada aytilishicha, chaqaloq Sabrin al-Sakani 21-aprel kuni yarim tunda Rafah kasalxonasida kesarcha kesish amaliyoti yordamida o‘lik ona tanasidan ajratib olingan. Shifokorlar chaqaloq o‘pkasiga havo kiritish uchun qo‘l pompasidan foydalanishgan.25-aprel kuni chaqaloq vafot etgan. Sabrin deb ism qo‘yilgan chaqaloq onasi yoniga dafn qilingan.
O‘tgan hafta oxirida Isroil havo kuchlari Sakani oilasi uyi va uning atrofidagi hududlarga hujum uyushtirganda, chaqaloqning onasi, uning turmush o‘rtog‘i Shukri, ularning uch yoshli qizi Malak voqea joyida halok bo‘lgan. Yetti yarim oylik Sabrin vafot etgan onasi qornida qolib ketgan.
Voqea joyiga yetib borgan qutqaruvchilar chaqaloqning hanuz tirik ekanligidan taajjubga tushishgan. Kasalxonada shifokorlar unga tezlik bilan yordam ko‘rsatishgan.
Chaqaloqning ahvoli barqarorlashgach, u maxsus inkubatorga joylashtirilgan. Shifokorlar o‘shanda uning ahvolini og‘ir deb baholagan.
Go‘dak tug‘ilganda atigi 1,4 kilogramm vaznga ega bo‘lgan. Og‘ir nafas olayotgan bo‘lgan. Shifokorlar bu holatni muddatidan oldin tug‘ilganlik sababi bilan izohlashgan.
“Bu bola ayni paytda ona qornida bo‘lishi kerak edi, lekin u bu huquqdan mahrum etilgan”, — degan Rafahdagi Amirlik kasalxonasining neonatal tez yordam bo‘limi boshlig‘i doktor Muhammad Salama.