RF prezidenti Vladimir Putin Federatsiya kengashiga Sergey Shoygu o‘rniga Andrey Belousovni mudofaa vaziri lavozimiga ko‘rib chiqishni taklif etgan.
Andrey Belousov 2020 yildan buyon RF hukumati raisi o‘rinbosari lavozimida ishlab kelayotgandi.
Rossiya davlat nashrlari tarqatayotgan xabarga ko‘ra, Shoygu Nikolay Patrushev o‘rniga Xavfsizlik kengashi kotibi lavozimiga o‘tkaziladi. Patrushev 2008 yildan buyon ushbu lavozimda ishlab kelayotgandi. Uning keyingi faoliyati haqida ma’lumot yo‘q.
1994-2012 yillarda Favqulodda vaziyatlar vaziri, 2012 yil mayidan noyabr oyiga qadar Moskva oblasti rahbari bo‘lgan Sergey Shoygu so‘nggi 12 yil davomida Rossiya harbiy vazirligini boshqarib kelayotgandi.
Kreml matbuot xizmati rahbari Dmitriy Peskovning aniqlik kiritishicha, Shoygu Xavfsizlik kengashi kotibi lavozimi bilan bir vaqtda Putinning Harbiy-sanoat komissiyasidagi o‘rinbosari hisoblanadi va Harbiy-texnik ta’minot bo‘yicha federal xizmat faoliyatini nazorat qiladi.
O‘z navbatida, Rossiya harbiy idorasidagi ikkinchi shaxs, RF qurolli kuchlari Bosh shtabi boshlig‘i Valeriy Gerasimov esa lavozimini saqlab qolgan.
Shuningdek, yangi hukumatda IIV rahbari Vladimir Kolokolsev, FVV rahbari Aleksandr Kurenkov, TIV rahbari Sergey Lavrov, adliya vaziri Aleksandr Chuychenko ham o‘z lavozimini saqlab qolgan.
Kuchishlatar idoralarda boshqa o‘zgarishlar yo‘q. Tashqi razvedka xizmati rahbari Sergey Narishkin, Federal xavfsizlik xizmati (FSB) direktori Aleksandr Bortnikov, Rosgvardiya rahbari Viktor Zolotov, Federal qo‘riqlash xizmati boshlig‘i Dmitriy Kochnev o‘z lavozimlarida qolgan.
Joylangan vaqt : (13 May 2024 01:00)
Manba: www.kun.uz
Tush.UZ - Tushlar tabiri