Nima bilan urdi (hajviya) [Habib Siddiq]

Nima bilan urdi (hajviya) [Habib Siddiq]

Oʻtgan asrning oltmishinchi yillarida viloyat partiya qoʻmitalari ikkiga: sanoat va qishloq xoʻjalik partiya qoʻmitalariga, boʻlingan edi. Viloyatning nufuzli idorasiga boshini durra bilan bogʻlab olgan ayol kelibdi. Eshikbonlar undan kelishining maqsadini soʻrashipti. — Obkoʻmga arzim bor, — depti ayol. — Qaysi obkoʻmga? — Obkoʻmga-da! — Hozir ikkita obkoʻm bor: qishloq xoʻjalik obkoʻmi, sanoat obkoʻmi. Arzingiz qaysi biriga? Ayol javob berolmay hayron boʻlibdi. — Nima masalada kelgansiz? — Erim urdi. Shundan shikoyat qilib keldim. Qaysi obkoʻmlaringga kirishim kerak. Endi eshikbonlar ham oʻylanib qolishibdi. — Eringiz nima bilan urdi?- soʻrabdi ulardan biri. — Sholi oʻrgani ketib yarim kechasi shirakayf boʻlib keluvdi, «oʻsha yoqda tunab qolavermabsiz-da» desam, «E-e», dediyu oʻroqni irgʻitib yubordi. Shunda... — Demak, oʻroq bilan ekan-da, — debdi eshikbon tanga topgan kalday iljayib. — U holda qishloq xoʻjalik obkoʻmiga kirarkansiz, opa... Mabodo, bolgʻa bilan urganda sanoat obkoʻmiga kirardingiz.

Muallif: Habib Siddiq