Tush.UZ - Tushlar tabiriGermaniya kansleri Olaf Shols amaldagi federal hukumatning HAMAS va “Hizbulloh” guruhlariga qarshi kurashda Isroilga yordam berish uchun qurol yetkazib berishni davom ettirishga tayyorligiga bildirilgan shubhalarni rad etdi.
“Yetkazib berish amalga oshirilgan va kelajakda ham amalga oshiriladi. Isroil har doim bunga umid qilishi mumkin,”, dedi Shols bundestagda hukumat bayonoti bilan chiqish qilar ekan.
Germaniya kansleri “Isroil ikki davlat birdamligiga hozir va kelajakda umid qilishi mumkin”ligini aytib, bu birdamlik Isroilga o‘z mamlakatini himoya qilish imkoniyatini berish va uni qo‘llab-quvvatlashni ham o‘z ichiga olishini qo‘shimcha qildi.
Shu bilan birga, Shols gumanitar yordam G‘azoga erkin tushishi kerakligini va “xalqaro huquq normalariga har doim rioya qilinishi kerakligini” ta’kidladi.
Sholsga ko‘ra, “pirovardida falastinliklar bilan ikki davlat negizida mojaroni hal etishga olib keladigan” istiqbolni ishlab chiqish lozim. Shuningdek, u garovdagilarni ozod qilishga xizmat qiladigan o‘t ochishni to‘xtatish muhimligini ta’kidlab, bu masalada AQSH Prezidenti Jo Baydenning takliflariga havola qilgan.
Shols, shuningdek, Eronni Isroilga raketalar bilan hujum qilishni to‘xtatishga chaqirgan.
“Mintaqada boshqa beqarorlik bo‘lmasligi kerak, Eron esa olov bilan o‘ynamoqda. Bu to‘xtashi kerak”, deydi Shols.
Avvalroq dpa nashri AQSH Yaqin Sharqda urush maydonidagi tinch aholining ahvolini yaxshilashga erishish maqsadida Isroilga bosim o‘tkazayotgani haqida xabar berar bergan edi. Vashington, agar yaqin 30 kun ichida bu masalada yaxshilanish kuzatilmasa, buni AQSH harbiy yordam ko‘rsatish to‘g‘risidagi qonunni buzish sifatida baholanishi mumkinligi haqida ogohlantirgan. Bunday holda, AQSHning Isroilga ko‘rsatayotgan harbiy yordami qisqartirilishi ehtimoli mavjud.
“Isroil armiyasining harakatlarini tanqid qilsa-da, Vashington Isroilga sezilarli harbiy yordam ko‘rsatishda davom etmoqda. Amerika ittifoqchilari Yaqin Sharq mamlakatida dunyodagi eng zamonaviylardan biri hisoblangan Terminal High-Altitude Area Defense (THAAD) havo hujumidan mudofaa tizimini joylashtirishni boshladilar”, deb yozadi dpa.