“Forsaj” yulduzi Pol Uokerga tegishli bo‘lgan Nissan Skyline sotuvga qo‘yildi

2000-yillar boshida Motorex kompaniyasi AQSHga rasman 16 ta Nissan Skyline R34 GT-R modellarini eksport qilgan. 2001-yilda ishlab chiqarilgan V-Spec II tavsifiga ega avtomobillardan biri sotuvga qo‘yildi, biroq mashina arzon emas — sportkarda “Forsaj” qahramoni Brayan O’Konnor harakatlangani yetmaganidek, uni rostdan ham aktyor Pol Uoker boshqargan. Birgina shu faktning o‘zi ham sportkar narxining qimmatligiga sabab bo‘ladi, deb xabar beradi Motor.

Avtomobilga ikkitalik turbopuflagichli olti silindr bilan jihozlangan 2,6 litrli dvigatel o‘rnatilgan bo‘lib, u 276 ot kuchi va 392 Nm aylanuvchi momentni taqdim eta oladi. Biroq sportkar yaponlarning “jentelmenlarga xos kelishuv”i davrida yig‘ilgan. Unga ko‘ra, milliy avtomobil ishlab chiqaruvchilar eng yuqori samaradorlikka ega modellarini 276 ot kuchi bilan cheklashi lozim bo‘lgan.

Aslini olganda uning quvvati texnik tavsifida ko‘rsatilganidan ancha yuqori. Mashina olti pog‘onali mexanik uzatmalar qutisi va ATESSA to‘liq uzatmasi bilan jihozlangan.

Avtomobilga ko‘p sonli GReddy aksessuarlaridan tashqari, zanglamaydigan po‘latli Trust gaz chiqarish tizimi, Tein TE37 Saga g‘ildiraklari va BF Goodrich lievreyasi bilan o‘rnatilgan. Salonida Momo Apache ruli va Spacro xavfsizlik kamarlari mavjud. AQSHda avtomobil Bayside Blue rangida sotilgan.

33,7 ming kilometr yo‘l bosgan mashinadan asosan Pol Uoker foydalangan. Sotuvga qo‘yilgan Nissan Skyline R34 GT-R V-Spec II narxi oshkor etilmagan, Hive Auto Group uni faqat real xaridorga aytishga tayyor — va mashinani xarid qilishda hech qanaqa test-drayv bo‘lmaydi.

Bundan oldin Avstraliyada “Forsaj” filmida suratga tushgan 50 yillik Chevrolet auksionga qo‘yilgani to‘g‘risida xabar berilgandi.