Mercedes-Benz dizayneri tilla, titan va buyvol shoxidan Maybach ko‘zoynaklarini yaratdi

Mercedes-AMG va Mercedes-Maybach kabi ko‘plab avtomobillarning yaratilishiga hissa qo‘shgan Mercedes-Benz Group’ning bosh dizayneri Gordon Vagener bu safar moda aksessuarlarni ishlab chiqaruvchilar bilan hamkorlikni yo‘lga qo‘ydi, deb xabar beradi Motor. Mutaxassis o‘z jamoasi bilan The Creator nomli quyoshdan himoya qiluvchi ko‘zoynaklarni yaratgan.

Ko‘zoynak dizayni Maybach’ning emblemasi va ushbu avtomobillardagi radiator panjarasi tasvirlarini takrorlaydi. Ko‘zoynaklar qo‘lda yig‘iladi va uning har birini yig‘ish uchun 200 ta harakatni amalga oshirish kerak — yakunda alohida elementlardan aksessuar tayyor bo‘ladi.

Ko‘zoynaklar titandan ishlangan bo‘lib, The Creator versiyasidan kelib chiqqan holda 22 qirotli tilla, pushti tilla yoki platina bilan qoplanadi. Ularning o‘ziga xosligi konstruksiyasida tabiiy shoxdan foydalanilganida. Material 1978-yildan beri hayvon shoxlari bilan ishlab kelayotgan IVKO kompaniyasi tomonidan yetkazib beriladi. Ko‘zoynaklarda Osiyo suv buqasi shoxidan foydalanilgan.

The Creator bozorga gardishlari dizayni, ishlangan metallik va linzalari rangi bilan farqlanuvchi o‘n xil variantda chiqadi. Shundan kelib chiqib narxi ham 2880 dollardan 3590 dollargacha bo‘ladi. Yangi ko‘zoynaklarni Maybach Icons of Luxury butiklaridan xarid qilish mumkin.