Brabus kompaniyasi Mercedes-Maybach GLS 600 ning originalidan uch barobar qimmat versiyasini taqdim etdi (video)

Mercedes avtomobillarini tyuning qilish bilan shug‘ullanuvchi Brabus kompaniyasi Mercedes-Maybach GLS 600 krossoverining “900” indeksi ostidagi versiyasini taqdim etdi.

Brabus dizaynerlari original Mercedes-Maybach GLS 600 ning tashqi ko‘rinishini jiddiy o‘zgartirmagan, uning uglerod plastikli keng g‘ildiraklar arkasi, old bamperining pastki qismi va avtomobil “quyruq” qismidagi diffuzori saqlanib qolgan. Asosiy o‘zgarish — kuzovdagi ortiqcha xromning olib tashlangani.

Krossoverga Mercedes-Maybach S-Class diskalari dizayniga ishora qiluvchi yangi 24 dyuymli g‘ildiraklar o‘rnatiladi. Bundan tashqari, pnevmatik “podvaska”sining sozlamalari ham o‘zgartirilgan: katta tezlikda u yo‘l yuzasi bilan oraliq masofani 25 millimetrga qadar qisqartiradi.

Avtomobil salonining orqa qatoridan ikkita alohida “kapitan” o‘rindiqlari o‘rin olgan — bu Mercedes-Maybach GLS 600 uchun eng hashamatli variant. Salon to‘liq uglerod plastikli naqshlarga ega qimmatbaho charm bilan qoplangan.

Yangi Brabus 900 quvvati 557 dan 900 ot kuchiga yetadigan V8 biturbomotor bilan jihozlangan. Buning yordamida GLS soatiga 70 kilometrga tezlashgan: maksimal tezligi 320 kilometr/soatga qadar yetadi. Avtomobilning soatiga 100 kilometr tezlikka chiqishi uchun 4,2 soniya kifoya qiladi.

Eng qiziq jihati — narxida: birinchi yig‘ilgan Brabus 900 narxi 532 ming dollarni tashkil etadi. Taqqoslash uchun, Germaniyada Mercedes-Maybach GLS 600 narxi 177,5 ming dollardan, O‘zbekistonda esa 258 ming dollardan boshlanadi.

Avvalroq Brabus 3,2 soniyada soatiga 100 kilometr tezlikka erisha oladigan dunyodagi eng tezkor krossoverni taqdim etgandi.