“Yagona to‘g‘ri yo‘limiz — mavjud xomashyoni to‘liq qayta ishlash orqali yuqori qo‘shilgan qiymat yaratish va anʼanaviy arzon bozorlardan qimmat bozorlarga kirib borish” — prezident

Prezident raisligida to‘qimachilik sohasida eksport va investitsiya hajmlarini oshirish masalalari yuzasidan videoselektor yig‘ilishida davlat rahbari sohadagi salohiyatdan foydalanilmasa, ishlab chiqarish ham, eksport ham, ish o‘rinlari ham ko‘paymasligini aytdi.

Bu borada yagona to‘g‘ri yo‘limiz – mavjud xomashyoni to‘liq qayta ishlash orqali yuqori qo‘shilgan qiymat yaratish va anʼanaviy “arzon” bozorlardan – yangi, “qimmat” bozorlarga kirib borish, — dedi prezident yig‘ilishda.

So‘ng davlat rahbari tarmoqda faoliyat yuritayotgan korxonalar rahbarlari bilan muloqot qilib, ularning muammolari va takliflarini eshitdi.

Muloqotda tadbirkorlar:

• korxonalarda mehnat unumdorligini oshirish;
• qo‘shilgan qiymat solig‘ini bir kunda qaytarish amaliyotini kengaytirish;
• bo‘yalgan mato eksportini kengaytirish;
• eksportoldi kreditlar olishni soddalashtirish;
• to‘qimachilik korxonalarining obyektlarini qurishda yengillik berish;
• korxonalarning arzon moliyaviy resurslarga ehtiyojini qondirish;
• mamlakatda ishlab chiqarilgan to‘qimachilik mahsulotlarini ommalashtirish masalalarini ko‘tardi. 

Davlat rahbari bildirilgan fikr va takliflarni chuqur o‘rganib, tegishli chora-tadbirlarni ishlab chiqish zarurligini taʼkidladi.

Jumladan, mutasaddilarga:

• “A” reytingi bor tadbirkorlarga ham ikki yil davomida qo‘shilgan qiymat solig‘ini qaytarish bo‘yicha bir kunda xulosa berish tizimini yo‘lga qo‘yish;
• xorijdagi “erkin zonalar”ning omborlarini ijaraga olish, bo‘yalgan mato eksport qilgan korxonalarga xorijiy valyutada kredit ajratish tizimini joriy qilish;
• tadbirkorlar reytingida “A” toifadagi eksportchi korxonalarga akkreditivni garovga olish va uni 70 foizi miqdorida aylanma mablag‘ uchun kredit ajratish tizimini yo‘lga qo‘yish;
• to‘qimachilik korxonalariga obyektlarni o‘z kuchi bilan qurishga ruxsat berish;
• gazlama, bo‘yash-pardozlash, tayyor tikuv-trikotajdagi 10 million dollargacha bo‘lgan loyihalar uchun chet el valyutasida olinadigan kreditlar bo‘yicha foiz xarajatlarining 6 foizdan yuqori qismini kompensatsiya qilish;
• to‘qimachilik korxonalari aylanmasi uchun berilgan kreditlarning qaytarish muddatini uzaytirib, tadbirkorlarga grafik bo‘yicha o‘z vaqtida qaytarilgan summaga teng miqdorda “revolver” kredit berish;
• poytaxt va viloyat markazlaridagi yirik savdo komplekslarida “O‘zbekistonda ishlab chiqarilgan” nomi ostida milliy mahsulotlar do‘konlarini tashkil qilish bo‘yicha asoslantirilgan takliflar kiritish topshirildi.

Joylangan vaqt : (17 Aprel 2024 07:01)

Manba: www.daryo.uz