Tush.UZ - Tushlar tabiriO‘zbekiston milliy terma jamoasi bosh murabbiyi Srechko Katanes 11-iyun kuni bo‘lib o‘tgan JCh—2026 saralashining ikkinchi bosqichidan o‘rin olgan Eron — O‘zbekiston (0:0) uchrashuvidan so‘ng matbuot anjumanida ishtirok etdi.
“Natijadan xursandman. Biroz himoyaviy o‘yin namoyish etdik. Golli vaziyatlar kam bo‘ldi, ayrim vaziyatlarda bizga omad kulib boqdi. Nima bo‘lganda ham ko‘rsatgan o‘yinimizdan qoniqish hosil qildim. Ikki jamoa ham “toza futbol” o‘ynadi.
Odatda o‘z maydonimizda hujumkorlik ko‘rsatamiz. Eronning 20 ta o‘yindan iborat golli seriyasi to‘xtagani bu shunchaki raqamlar xolos. Bugungi bahs natijasi u qadar muhim emasdi, chunki keyingi bosqichga muddatidan avval yo‘l olgan edik. Shunga qaramasdan har jabhada raqib bilan tengma-teng o‘ynadik. Futbolchilar men istaganimdek harakat qilishdi va taktik jihatdan xatoliklar kuzatilmadi. Birinchi bo‘limda Oston O‘runovning zarbasiga biroz aniqlik yetishmadi. Qiyin vaziyatlardan chiqib keta olish uchun har qanday vaziyatga tayyor turishimiz shart. O‘ylaymanki, durang natija har ikki jamoa uchun yaxshi bo‘ldi”, — deydi O‘zbekiston terma jamoasi bosh murabbiyi Srechko Katanes.
Ma’lumot uchun, O‘zbekiston terma jamoasi saralashning ikkinchi bosqichini muvaffaqiyatli yakunladi. Terma jamoa 6 uchrashuvda 14 ochko to‘pladi. E guruhidan o‘rin olgan jamoa raqiblar darvozasiga 13 bor yo‘l topdi va 4 bora o‘z darvozasi dahlsizligini saqlab qola olmadi. Shunday qilib, Erondan to‘plar nisbatiga ko‘ra ortda qolgan jamoa ikkinchi o‘rin bilan uchinchi bosqichga yo‘l oldi.