Cherchesovdan yana bir ajoyib kesatiq: “Sizda qizil qalpoq bor, balki qizil kartochka sizga quvonch keltirgandir”

Qozog‘iston terma jamoasi bosh murabbiyi Stanislav Cherchesov Avstriyaga qarshi Millatlar Ligasi o‘yinida Aleksandr Marochkinning chetlatilishi haqida gapirdi.

“Qizil kartochka menga quvonch keltirmadi. Sizga keltirdimi? Sizda qizil qalpoq bor, balki bu sizga quvonch keltirgandir (jurnalistga murojaat qildi).

Buni jamoa sifatida tahlil qilamiz. U mas’uliyatsiz o‘ynadi. Biz futbolda ichidamiz, xatolar bo‘ladi. Sababini topamiz. Sizningcha, u o‘yinga tayyor emas edimi?” dedi Cherchesov.

• Ushbu uchrashuvda Marochkin 23-daqiqada maydondan chetlatildi.
• Qozog‘iston 0:2 hisobida mag‘lub bo‘ldi.
• Cherchesov qo‘l ostidagi terma jamoa hisobida 0 ta g‘alaba va 0 ta gol bor.

Ushbu mag‘lubiyatdan so‘ng jamoa Millatlar Ligasida C ligaga tushib ketdi.

Ma’lumot uchun,  qo‘shni Qozog‘iston jamoasi rossiyalik murabbiy boshchiligida 5 ta o‘yinda maydonga tushdi va 4 bor mag‘lubiyatga uchradi. Cherchesov murabbiy sifatida jamoani olib tushgan ilk o‘yinda jamoa Norvegiya bilan durang qayd etdi — 0:0.

Bosh murabbiy va jurnalistlar o‘rtasida turli kelishmovchiliklar bor. Avvalroq murabbiy qozoq tilida savol bergan jurnalistga qarata “Nega menga bunday murojaat qilyapsiz? Sizga osetin tilida javob bersam bo‘ladimi?”, degan edi.

13-oktyabr kuni Millatlar Ligasida Sloveniyaga mag‘lub bo‘lgach (0:1) Cherchesov “PSJ” futbolkasida anjumanga kelib qozoq tilida savol bergan jurnalistga “fransuzcha gapirayapsanmi” deya ustidan kulgan. Aynan shu sabab bilan u 738 ming 400 tenge miqdorida (taxminan 1500 AQSH dollari) jarimaga tortilgandi.

Joylangan vaqt : (Bugun 12:04)

Manba: www.daryo.uz