Tush.UZ - Tushlar tabiriShvetsiya va Finlandiya o‘rtasidagi ikkita optik tolali kabelda uzilish sodir bo‘ldi. Bu haqda Shvetsiyaning SVT teleradiokompaniyasi xabar berdi.
Shvetsiya telekommunikatsiya va pochta boshqarmasi (Ps) matbuot kotibi Piter Ekstedtning so‘zlariga ko‘ra, kabellar Finlandiya hududida, Xelsinkidan 3-4 kilometr uzoqlikda ikki joyidan uzilgan.
Global Connect telekom-kompaniya vakilligi Niklas Esktremning ma’lum qilishicha, uzilishlardan biri Espooda, ikkinchisi Vixtida yuz bergan. Nosozliklardan biri hozirda bartaraf etilgan, ikkinchisi ustida ish olib borilmoqda. Uning so‘zlariga ko‘ra, uzilishlar sabab Finlandiyadagi 6 mingga yaqin uy xo‘jaligi jabr ko‘rgan. Shvetsiya tomoniga esa hech qanday zarar yetmagan.
Shvetsiya fuqarolik mudofaasi vaziri Karl-Oskar Bolinning qayd etishicha, uzilishlar qasddan amalga oshirilgan bo‘lishi mumkin. Fin politsiyasi ham jinoyat sodir etilganidan gumon qilmoqda. Finlandiya aloqa vaziri Lulu Rannening ma’lum qilishicha, hukumat kabellar uzilishi bo‘yicha tergov olib bormoqda.
Eslatib o‘tamiz, 18 noyabr kuni Boltiq dengizi tubidan Finlandiyadan Germaniyaga va Shvetsiyadan Litvaga o‘tgan kabellarga shikast yetkazilgani ma’lum bo‘lgandi. Germaniya va Finlandiya Tashqi ishlar vazirliklari tergov olib borilayotgani, bu kabi holat «qasddan amalga oshirilgani bo‘yicha shubha uyg‘otayotganini» ma’lum qildi. Litva Bosh prokuraturasi vakili idora rasmiy tergov boshlash bo‘yicha ma’lumot to‘playotganini bildirdi. Keyinroq Shvetsiya prokuraturasi Boltiq dengizidagi ikkita suvosti kabelining shikastlanishi bilan bog‘liq qo‘poruvchilik harakati bo‘yicha dastlabki tergovni boshlagani ma’lum bo‘ldi.
Daniya Harbiy-dengiz kuchlari mazkur voqeaga aloqadorlikda gumonlab Xitoyning Yi Peng 3 kemasini to‘xtatgan. Keyinroq The Wall Street Journal yevropalik tergovchilar Xitoy kemasi kapitani qasddan suvosti kabeliga shikast yetkazgan bo‘lishi mumkin degan xulosada ekani haqida yozdi. Tergov versiyasiga ko‘ra, kabellar kema langarni tashlab, uni 180 kilometrdan ortiq masofaga sudragani ortidan shikastlangan va kapitan buni payqamagan bo‘lishi «ehtimoli juda kam».