Tush.UZ - Tushlar tabiriGurjiston Konstitutsiyaviy sudi prezident Salome Zurabishvili va muxolifat partiyasi vakillarining ko‘plab qonunbuzarliklar tufayli parlament saylovlarini o‘tmagan deb topish hamda uning natijalarini bekor qilish borasidagi da’vosini rad etdi. Bu boradagi tegishli qaror sud saytida e’lon qilindi.
Qaror Konstitutsiyaviy sud to‘qqiz nafar sudyasining yetti nafari tomonidan qo‘llab-quvvatlangan. Ta’kidlanishicha, ushbu qaror yakuniy bo‘lib, uning ustidan apellyatsiya berilmaydi yoki qayta ko‘rib chiqilmaydi.
Gurjiston Konstitutsiyaviy sudining ikki sudyasi — Giorgi Kvechernchxiladze va Teymuraz Tugushi umumiy qaroriga qarshi chiqish qilgan.
Gurjiston prezidenti Salome Zurabishvili mamlakat Konstitutsiyaviy sudiga 26 oktyabr kuni bo‘lib o‘tgan parlament saylovlari natijalarini tan olmaslik talabi bilan murojaat qilgandi. Prezidentning da’vosi ovoz berishning universalligi va maxfiyligi tamoyillarining buzilishi bilan bog‘liq. Shu munosabat bilan uning fikricha, Markaziy saylov komissiyasi e’lon qilgan saylov natijalari bekor qilinishi kerak.
Noyabr boshida ovoz berish maxfiyligi buzilgani sababli 30 ta saylov uchastkasida saylov natijalari bekor qilindi. Hukmron «Gurjiston orzusi» partiyasi 53,9 foiz ovoz olib, parlament saylovlarida rasman g‘alaba qozondi.
Tbilisida ketma-ket besh kundan beri hukumatning Gurjiston Yevropa Ittifoqiga qo‘shilishi bo‘yicha muzokaralarni muzlatib qo‘ygani bois norozilik namoyishlari bo‘lib o‘tmoqda. Politsiya va maxsus xizmat kuchlari aksiyani «vodomyot» va ko‘zni yoshlantiruvchi gazlar yordamida tarqatmoqda. Hozirga qadar namoyishlarda ishtirok etgan 200 dan ortiq inson qo‘lga olingan.