Tush.UZ - Tushlar tabiriBelarus prezidenti Aleksandr Lukashenko mamlakatga «o‘ndan ortiq» yadroviy kallaklar olib kelinganini ma’lum qildi. U boshqa mamlakatlarni davlat chegarasi buzilgudek bo‘lsa, zudlik bilan javob qaytarishi haqida ogohlantirganini qo‘shimcha qildi.
«Men bu yerga yadroviy kallaklarni olib keldim. Ular o‘ndan ortiq. Ko‘pchilik «bu hazil, hech kim hech narsa olib kelmadi», deb yozmoqda. Olib kelindi. Ular [muxoliflar] buni hazil deb aytayotgani, ko‘zdan qochirganliklarini anglatadi. Ular hatto qanday olib kelinganini ham payqamay qolishdi», — deydi Belarus prezidenti.
Aleksandr Lukashenko yadroviy qurolni qo‘llashni katta mas’uliyat deb atadi. «Men barcha dushmanlarim, «do‘stlarim» va raqiblarimni ogohlantirdim: davlat chegarasi chizig‘iga qadam qo‘yishingiz bilan shu ondayoq javob bo‘ladi. Men yadroviy qurol yoki boshqa narsaga qarab o‘tirmayman», — deya qo‘shimcha qiladi u.
Lukashenkoning qayd etishicha, Belarus qo‘lga kiritgan yadroviy kallaklar «Oreshnik» ballistik raketasidan besh barobar kuchli. Shuningdek, u «Oreshnik»ni uchirishga mo‘ljallangan qurilmalar Belarusda ishlab chiqarilganini ma’lum qildi.
2024 yil martda Moskva va Minsk Rossiya taktik qurollarini Belarusga joylashtirish bo‘yicha kelishib olgandi. Aprelda Aleksandr Lukashenko Rossiya hukumati mamlakatga «o‘nlab zamonaviy yadroviy kallaklarni» qaytarish bo‘yicha qaror qabul qilganini aytgan edi.
Avvalroq Putin va Lukashenko xavfsizlik kafolatlari to‘g‘risidagi shartnomani imzolagan edi. Belarus poytaxtida imzolangan hujjat ittifoq davlatlarini «barcha vositalar», jumladan, yadroviy quroldan foydalanib bo‘lsa ham himoya qilishni nazarda tutadi.