Tush.UZ - Tushlar tabiriRossiya prezidenti Vladimir Putin Kursk viloyati gubernatori Aleksey Smirnovni avgust oyida Ukraina armiyasining bostirib kirishidan keyin yuzaga kelgan boshqaruvdagi “xaos” tufayli iste’foga chiqardi. Bu haqda manbalarga tayanib, “Vyorstka” xabar berdi.
Manbalarga ko‘ra, prezident administratsiyasida Smirnov o‘rnini egallovchi nomzodni noyabr boshida izlash boshlangan, biroq Putin gubernator vazifasini bajaruvchi etib tayinlagan Aleksandr Xinshteyn nomzodi bir kun oldin kelishilgan.Smirnov hal qila olmagan asosiy muammolar — Ukraina armiyasi tomonidan egallangan hududlardan ko‘chirilgan aholi noroziligi va e’tirozlari, shuningdek gubernator lavozimidan olib tashlashga erishmagan mahalliy hokimiyat rahbarlari bilan kelishmovchiliklar edi.
Bundan tashqari, mahalliy amaldorlar ta’kidlashicha, Smirnovning iste’foga chiqishining yana bir sababi — Ukraina bilan chegarada qurilgan mudofaa inshootlari bo‘lib, ular “hal qiluvchi lahzada hech qanday foyda keltirmagan”.
Hozir u yerda tekshiruvlar va jinoiy ishlar olib borilmoqda. Ehtimol, taftish natijalari nihoyat oliy rahbariyatgacha yetib borgan bo‘lishi mumkin, dedi mahalliy amaldorlardan biri.“Vyorstka” nashrining boshqa suhbatdoshi Smirnovni qamoqqa olishlari mumkinligini taxmin qildi. Biroq bunday holatda may oyida transport vaziri lavozimiga o‘tgan uning salafi Roman Starovoyt ham javobgarlikka tortilishi lozim.
Starovoyt o‘z vorisining iste’fosini Kursk viloyati aholisi bilan yetarlicha samarali muloqot o‘rnatmagani bilan izohladi. U viloyat va federal darajada hudud aholisini qo‘llab-quvvatlash uchun 160 dan ortiq chora-tadbirlar ishlab chiqilganini aytdi.
Bu chora-tadbirlarning qanday amalga oshirilayotganini odamlarga tushuntirish masalasida muammolar yuzaga keldi. Albatta, vaziyat murakkab. Chamasi, aynan shu sababli (muddatidan oldin iste’foga chiqarish) haqida qaror qabul qilingan, deb ta’kidladi Starovoyt.
Smirnov Kursk viloyati gubernatori lavozimida jami 209 kun, shu jumladan vaqtinchalik vazifani bajaruvchi sifatida faoliyat yuritdi. Siyosatshunos Mixail Vinogradovning ta’kidlashicha, Putin davrida undan kamroq muddat faqat Yevgeniy Zinichev (Kaliningrad viloyati, 71 kun) va Sergey Shoyguda (Moskva viloyati, 180 kun) kuzatilgan.
Smirnov o‘rniga tayinlangan Xinshteyn Davlat Dumasining eng ta’sirli deputatlaridan biri hisoblanadi. U LGBT targ‘ibotini taqiqlash, Rossiyada IT-kompaniyalarni “mahalliylashtirish” to‘g‘risidagi qonun, “nomaqbul” tashkilotlarda reklamani man etish va boshqa qator qonunlar muallifi bo‘lgan. Bundan tashqari, u 2016-2018-yillarda “Rosgvardiya” rahbari Viktor Zolotovning maslahatchisi sifatida faoliyat yuritgan. Hozirgacha Davlat dumasida ushbu kuch tuzilmasining manfaatlarini himoya qiluvchi shaxs sifatida qaraladi.
Kursk viloyatining bir qismi hozirda Ukraina armiyasi nazoratida. 6-avgust kuni Ukraina qo‘shinlari viloyatga hujum boshladi va janglarning birinchi haftasida 1300 kvadrat kilometrlik hudud, 100 ga yaqin aholi punktlarini egalladi. Sentyabr oyidan beri Rossiya qo‘shinlari Ukraina armiyasini siqib chiqarishga faol harakat qilmoqda. Noyabr oyi oxiriga kelib Ukraina o‘z nazorati ostidagi hududning qariyb 40 foizini yo‘qotdi. Ukraina harbiylariga ko‘ra, ularga yanvar oyi oxirigacha, ya’ni AQSH hokimiyatga saylangan prezident Donald Tramp kelguncha egallab turgan pozitsiyalarini saqlab turish buyurilgan.