Tush.UZ - Tushlar tabiriMeksika va Kanada Vashingtondan moliyaviy yordam olishni davom ettirmoqchi bo‘lsa, AQSh tarkibiga kirishi kerak. Bu haqda AQShning yangi saylangan prezidenti Donald Tramp NBC News’ga bergan intervyusida ma’lum qildi.
«Biz Kanadaga har yili 100 milliard dollardan ko‘proq subsidiya beramiz, Meksikaga esa qariyb 300 milliard dollar subsidiya ajratamiz. Nima uchun biz ushbu mamlakatlarni subsidiyalayapmiz?.. Bizning [yangi] shtatimizga aylanishsin», — deydi u.
Aftidan Tramp AQShning ushbu ikki mamlakat bilan savdo balansi defitsitini nazarda tutgan ko‘rinadi, ammo raqamlar oshirib ko‘rsatilgan. AQSh Aholini ro‘yxatga olish byurosi ma’lumotlariga ko‘ra, 2023 yilda Kanada bilan defitsit qariyb 41 milliard dollarni, Meksika bilan esa 162 milliard dollardan ziyodni tashkil etgan.
Avvalroq Tramp prezidentlik lavozimining birinchi kunidanoq Kanada va Meksika noqonuniy migratsiya va narkotrafikka qarshi yetarlicha kurashmasa, ushbu mamlakat tovarlariga 25 foizli boj joriy etilishini ma’lum qilgandi.
Bunga javoban Meksika iqtisodiyot vaziri Marselo Ebrard bu kabi qadam AQShda 400 ming ish o‘rni qisqarishi va iste’mol narxlari oshishiga olib kelishini ma’lum qilgan. Uning so‘zlariga ko‘ra, shuningdek, Meksikada mahsulotlarini ishlab chiqaradigan Amerika kompaniyalari ham xavf ostida qoladi, chunki bojlarning joriy etilishi soliqlarni ikki barobar oshirishga olib keladi. Masalan, respublikada yig‘ilib, AQShda sotiladigan pikaplarning 88 foizining narxi har biri uchun o‘rtacha 3 ming dollarga qimmatlashadi. O‘z navbatida Meksika prezidenti Klaudiya Sheynbaum bunday choralarga javob tarzida bojlarni oshirish bilan tahdid qildi.
Kanada bosh vaziri Jastin Tryudo ham Trampning bayonotiga munosabat bildirib, AQShga o‘tadigan noqonuniy migratsiya oqimini kamaytirish uchun chegara nazorati choralarini kuchaytirishga va’da berdi. Mamlakat jamoat xavfsizligi vaziri Dominik Leblan esa buning uchun dronlar va vertolyotlar jalb etilishi mumkinligini ta’kidladi.
Bundan tashqari, Tryudo 29 noyabr kuni Tramp bilan uchrashish uchun uning Mara-Lagodagi qarorgohiga tashrif buyurgandi. Fox News manbasiga ko‘ra, o‘shanda ham Amerikaning yangi saylangan prezidenti Kanadaga AQShning 51-shtati bo‘lish borasida hazil qilgan.
Ayni vaqtda har uchala mamlakat o‘rtasida USMCA bitimi doirasida bojsiz savdolar amal qiladi — u Trampning birinchi prezidentlik muddati davomida imzolangan. Hujjatni qayta ko‘rib chiqish esa 2026 yilga rejalashtirilgan.