Tush.UZ - Tushlar tabiriToshkentda kontent uchun hojatxona qog‘ozlari uyumiga chiqib, katta tezlikda harakatlangan mashina ustidan sakrab o‘tgan bloger javobgarlikka tortildi. Bu haqda Toshkent shahar IIBB YHXB axborot xizmati boshlig‘i Qahramon Xudayberganov ma’lum qildi.
Ijtimoiy tarmoqlarda bir guruh shaxslar qadoqdagi hojatxona qog‘ozlarini yig‘ib, uni avtomobil bilan buzib o‘tgani aks etgan video tarqaldi. Shundan so‘ng internetda mazkur holat tasvirga olib bo‘lingach, hojatxona qog‘ozlari yig‘ishtirilmay, atrof-muhitni ifloslantirib ketilgani haqida video paydo bo‘ldi.
Qahramon Xudayberganov video ishtirokchisi bo‘lgan Jasurbek Shodiyev («Jasjan») ismli shaxs holat bo‘yicha javobgarlikka tortilganini ma’lum qildi. Bloger uni «kontent uchun» qilgani, video tarmoqlarda 4 milliondan ortiq marotaba ko‘rilganini aytdi. U holat takrorlanmasligini aytib, uzr so‘radi.
Ma’lum bo‘lishicha, voqea 30 dekabr kuni Toshkent viloyatining Toshkent tumanidagi «Bog‘bon» MFY hududida bo‘lgan. Fuqaro hojatxona qog‘ozlari uyumi ustiga chiqqan paytida «VAZ-2107» rusumli transport vositasi uning ostidan katta tezlikda yurib o‘tgan. Fuqaroga hech qanday jarohat yetmagan, mashinaning esa old oynasi va bamperlari shikastlangan.
Ekologiya vaziri maslahatchisi Rasul Kusherbayev o‘zining Telegramʼdagi kanalida fuqaroga IIBdan tashqari, Ekologiya inspeksiyasi xodimlari atrof-muhitni ifloslantirgani bo‘yicha BHMning 5 baravari miqdorida (1 mln 875 ming so‘m) jarima qo‘llagani haqida xabar berdi.
Shuningdek, videoda tasvirlangan transport vositasi ham topilib, jarima maydoniga joylashtirilgan va ma’muriy bayonnoma rasmiylashtirilgan.
Eslatib o‘tamiz, 2022 yil sentabrda ushbu blogerning Instagram akkaunti ko‘zdan kechirilgan vaqtda, jamoat joylarida uyatli so‘zlar bilan so‘kinib, fuqarolarga haqoratomuz shilqimlik qilib, jamoat tartibini va fuqarolarning osoyishtaligini buzuvchi videomateriallar joylashtirib kelgani aniqlangan edi. O‘shanda Jasurbek Shodiyevga nisbatan 15 sutka ma’muriy qamoq jazosi tayinlangandi.