Tush.UZ - Tushlar tabiriIsroil harbiylari Xon-Yunisda HAMAS guruhining ichki xavfsizlik apparati rahbari Husam Shohvonni o‘ldirdi. Bu haqda Isroil mudofaa kuchlari (IDF) xabar berdi.
«Chorshanbaga o‘tar kechasi razvedka ma’lumotlariga asoslanib, havo kuchlari Xon-Yunisdagi gumanitar hududga zarba berdi va G‘azo sektori janubidagi HAMAS ichki xavfsizlik apparati rahbari, terrorchi Husam Shohvonni yo‘q qildi», deyiladi bayonotda.
IDF xabariga ko‘ra, Shohvon Isroil bo‘linmalariga hujumlar paytidagi vaziyatni baholash uchun mas’ul bo‘lgan.
Isroil harbiylarining aniqlik kiritishicha, Shohvonni yo‘q qilish chog‘ida ular tinch aholi uchun xavflarni minimallashtirish, jumladan, qo‘shimcha razvedka o‘tkazish, hududni havodan kuzatish va aniq boshqariladigan o‘q-dorilardan foydalanish choralarini ko‘rgan.
O‘z navbatida, The Times of Israel nashrining aniqlik kiritishicha, Shohvon HAMAS politsiya kuchlari rahbari o‘rinbosari bo‘lgan. Tasdiqlanmagan ma’lumotlarga ko‘ra, Shohvon bilan birga politsiya boshlig‘i Mahmud Saloh, shuningdek, yana to‘qqiz kishi, jumladan ayollar va bolalar ham halok bo‘lgan.