Tush.UZ - Tushlar tabiriDnestrbo‘yida sanoat korxonalari ishi energiya resurslari yetishmasligi tufayli to‘xtatildi. Bu haqda 2 yanvar, payshanba kuni hukumat bosh vazirining birinchi o‘rinbosari, tan olinmagan Dnestrbo‘yi Moldaviya Respublikasi (DMR) iqtisodiy rivojlanish vaziri Sergey Obolonik ma’lum qildi. «Inqiroz shunchalik og‘irki, qaysi korxonalar to‘xtaganini sanab o‘tishning hojati yo‘q, faqat oziq-ovqat ishlab chiqarish bilan shug‘ullanadiganlar bundan mustasno», — deya uning so‘zlaridan iqtibos keltiradi «Novosti Pridnestrovya» Telegram-kanali. Vaziyat Rossiya gazini Ukraina orqali yetkazib berishning to‘xtatilishi bilan bog‘liq.
DMR hukumati 5 yanvardan keyin vaziyatni batafsil tahlil qilishi kutilmoqda, bunda fuqarolik sektorida iste’mol qanday ekani aniq bo‘ladi. «Biz energiya balansini qandaydir tarzda topish uchun ma’lum energiya xarajatlarini bloklash yoki kamaytirish orqali sanoat agentlarimizni qo‘llab-quvvatlash imkonini qidiramiz», dedi Obolonik. Vazir energetika sohasidagi vaziyat ijobiy tomonga o‘zgarishiga umid bildirdi va agar energiya inqirozi uzoq vaqt davomida hal etilmasa, «qaytarib bo‘lmaydigan o‘zgarishlar ro‘y berishi, ya’ni korxonalar o‘z imkoniyatlarini yo‘qotishi mumkin»ligini tushuntirdi.
Dnestrbo‘yi aholisi issiqlik, gaz va issiq suvsiz qoldi
Rossiya gazining Ukraina orqali tranziti to‘xtatilgani sababli tan olinmagan Dnestrbo‘yi aholisi 1 yanvar kunidan beri gaz, issiqlik va issiq suvsiz qolmoqda.
«Korxonaning issiqlik ishlab chiqarish obektlariga gaz yetkazib berish vaqtincha to‘xtatilishi munosabati bilan 2025 yil 1 yanvar soat 7.00 dan boshlab aholini isitish uchun issiqlik energiyasi va issiq suv bilan ta’minlash to‘xtatiladi», — deyiladi «Tirasteploenergo» kompaniyasi xabarida. Faqatgina shifoxonalar uchun istisno qilingan.
Hozir Tiraspol va uning atrofida kunduzi +7°C, kechasi esa -2°C atrofida. Fuqarolarga issiq suv jo‘mraklarini ochmaslik va batareyalar ichidagi suvni to‘kmaslik tavsiya qilindi. Isitish uchun elektr isitgichlardan foydalanish, deraza va eshiklardagi yoriqlarni yopish, ularni adyol va pardalar bilan yopish taklif etilgan. «Issiq kiyining va o‘tkir respiratorli infeksiyalar va grippdan profilaktika dori-darmonlarini qabul qiling», deya qo‘shimcha qildi «Tirasteploenergo».