AQSh va YeI Moskvaga bosimni davom ettirishga kelishib oldi

AQSh davlat kotibi Marko Rubio va Yevropa Ittifoqi diplomatiyasi rahbari Kaya Kallas «Ukrainada adolatli va mustahkam tinchlikka» erishish uchun Rossiyaga «maksimal bosim»ni davom ettirishga kelishib oldi. Bu haqda YeI vakili 28 yanvar, seshanba kuni Rubio va Kallas o‘rtasidagi birinchi telefon suhbatidan so‘ng ma’lum qildi, deb yozadi AFP.

Ikkala diplomat ham «asosiy global muammolar, jumladan, Rossiyaning Ukrainadagi urushi, Yaqin Sharqdagi vaziyat va Xitoy tomonidan qo‘yilayotgan muammolar bo‘yicha Yevropa Ittifoqi va AQSh o‘rtasidagi hamkorlikni mustahkamlash» muhimligini ta’kidladilar», deya ma’lum qildi Bryussel.

Suhbat davomida Kallas o‘z suhbatdoshiga Yevropa komissiyasi Rossiyadan qishloq xo‘jaligi mahsulotlari va o‘g‘itlarga bojlarni oshirishni taklif qilganini aytdi. Yangi bojlar «ehtimol, Rossiyaning eksport daromadlariga va Rossiyaning Ukrainaga qarshi agressiv urush olib borish qobiliyatiga salbiy ta’sir ko‘rsatishi mumkin», deyiladi bayonotda.

Tramp Ukrainadagi urushni 100 kun ichida tugatish niyatida

AQSh prezidenti lavozimiga kirishganidan bir necha kun o‘tgach, Donald Tramp Ukraina va Rossiya bo‘yicha maxsus vakili, iste’fodagi general Keyt Kellogga Rossiyaning Ukrainaga qarshi urushini 100 kun ichida tugatishni buyurdi, deb yozadi The Wall Street Journal (WSJ) 22 yanvar kuni. Jurnalistlarning qayd etishicha, Putin bilan kelishuv tuzish Tramp saylovoldi tashviqoti paytida Oq uyga qaytganidan keyin 24 soat ichida Ukrainadagi urushni tugatishga va’da berganidan keyin qiyinroq bo‘ladi.

Avvalroq AQSh yangi davlat kotibi Marko Rubio urushni tugatish AQShning Donald Tramp prezidentligi davridagi «rasmiy siyosati» bo‘lishini aytgan edi.


Joylangan vaqt : (29 Yanvar 2025 09:00)

Manba: www.kun.uz
Tavsiya qilamiz
. Яндекс.Метрика