Qonun hujjatlariga zid 195 ta qaror va farmoyish qabul qilingan

Prezidentimiz tashabbusi bilan bir necha yil avval “Xalq davlat idoralariga emas, davlat idoralari xalqqa xizmat qilishi lozim” tamoyili asosida boshlangan islohotlar bugun o‘z mevasini bermoqda. Buni Andijon viloyati Adliya boshqarmasi, uning tuman, shahar bo‘limlari tomonidan 2024 yilda amalga oshirilgan ishlar misolida ham ko‘rish mumkin.

– O‘tgan yil davomida boshqarma va tuman, shahar bo‘limlarimizga inson huquqlarini himoya qilish, davlat xizmatlari ko‘rsatish, huquqni qo‘llash amaliyoti, notariat va boshqa sohalarga oid 20 ming 362 ta murojaat kelib tushdi, – deydi Andijon viloyati Adliya boshqarmasi boshlig‘i Otabek Bozorov. – Murojaatlarning 19 ming 846 tasi yoki 97 foizi hal etildi, ya’ni 16 ming 205 tasi qanoatlantirildi, 3 ming 641 tasiga huquqiy tushuntirish berildi.

Murojaatlar asosida turli idoralarga 381 ta taqdimnoma, shuningdek, sudlarga 30,3 milliard so‘mdan ortiq mablag‘ni qaytarish yuzasidan 417 ta da’vo arizasi, ma’muriy javobgarlikka tortish yuzasidan 78 ta taklif kiritildi.

Boshqarma, uning tuman, shahar bo‘limlari tomonidan o‘tgan yili 2 ming 489 ta o‘rganish va monitoring tadbirlari o‘tkazildi. O‘rganishlar davomida aniqlangan qonunbuzilish holatlarini bartaraf etish yuzasidan tegishli idoralarga jami 899 ta taqdimnoma kiritildi. Ana shu taqdimnomalar asosida fuqaro va tadbirkorlarga 81,5 milliard so‘mga yaqin mablag‘ qaytarildi, shuningdek, 4 ming 432 ta hujjat bekor qilindi yoki qonun talablariga muvofiqlashtirildi, 106 nafar shaxs intizomiy javobgarlikka tortildi, 7 nafar fuqaro bilan tuzilgan mehnat shartnomasi bekor qilindi.

Bundan tashqari, 2024 yilda viloyatdagi Davlat xizmatlari markazlari orqali aholi va tadbirkorlik sub’ektlariga 850 mingga yaqin xizmat ko‘rsatilgan. Shundan 495 mingdan ortiq xizmat ko‘chmas mulk, ta’lim, lisenziya, ijtimoiy sohalarga oid bo‘lsa, 81 mingdan ortiq xizmat tadbirkorlik sub’ektlarini hisobga qo‘yishning avtomatlashtirilgan tizimi orqali davlat ro‘yxatidan o‘tkazish va qayta ro‘yxatdan o‘tkazish bo‘yicha ko‘rsatildi.

Hozirgi kunda aholiga markazlar tomonidan 400 dan ortiq davlat xizmatlari ko‘rsatilmoqda, joriy yilda ularga yana 10 dan ortiq turdagi yangi davlat xizmatlari qo‘shildi.

Boshqarmaning Yuridik xizmat ko‘rsatish markazlari tomonidan 2024 yil davomida 540 ming 503 ta hujjat loyihasi huquqiy ekspertizadan o‘tkazildi. Ulardan 7 ming 318 tasiga salbiy xulosa berilgan. Shuningdek, 42 ming 186 ta hujjat loyihasida kamchiliklar mavjud bo‘lganligi tufayli tashkilotlarga qaytarilgan.

O‘tgan yili viloyatda adliya organlari tomonidan mahalliy hokimiyat idoralari hamda nazorat qiluvchi, xizmat ko‘rsatuvchi va boshqa davlat tashkilotlarida 920 marotaba normativ-huquqiy hujjatlar tahlil qilindi. Shuningdek, sohaga oid jamoatchilik fikrini o‘rganish maqsadida 73 marotaba so‘rovnomalar o‘tkazildi. O‘rganish va so‘rovnomalar natijalari tahlil etilib, tegishli tashkilotlarga xulosa, taklif va tavsiyalar yuborildi.

Adliya organlari tomonidan “E-qaror” elektron tizimida monitoringlar olib borilib, mahalliy davlat hokimiyati organlari tomonidan qabul qilingan qaror va farmoyishlar doimiy o‘rganib borilmoqda. O‘tkazilgan monitoring va o‘rganishlar natijasida 195 ta qonun hujjatlariga zid qaror hamda farmoyishlar qabul qilinganligi aniqlangan.

Aniqlangan noqonuniy qarorlar yuzasidan hokimlik hamda boshqa davlat organlari, tashkilotlariga 53 ta taqdimnoma, 16 ta ogohnoma va sudga 1 ta da’vo arizasi kiritildi.

Ta’kidlash joizki, amalga oshirilayotgan yuqoridagi kabi ishlar natijasida fuqarolar va tadbirkorlarga qulayliklar yaratilmoqda, muammolari ijobiy hal etilmoqda, qolaversa, ularning davlat idoralariga bo‘lgan ishonchi yanada mustahkamlanmoqda.


Joylangan vaqt : (29 Yanvar 2025 11:00)

Manba: www.aniq.uz
Tavsiya qilamiz
. Яндекс.Метрика