Suriya Rossiyadan Bashar Asadni ekstradisiya qilishni talab qilmoqda

Suriya hukumati Rossiyadan Bashar al-Assadni ekstradisiya qilishni talab qildi.

Bu haqda Reuters xabar berdi.

Rossiya tashqi ishlar vaziri o‘rinbosari Mixail Bogdanov boshchiligidagi delegasiya 28 yanvar kuni Suriyaga yetib keldi. Bogdanov tashrif davomida Suriya ma’muriyatining yangi rahbari Ahmad al-Shara bilan uchrashdi.

Bogdanovning so‘zlariga ko‘ra, “Rossiyaning Suriyadagi mavjudligi o‘zgarmagan va tomonlar maslahatlashuvlarni davom ettirishga kelishib olgan”.

Agentlik ma’lumotlariga ko‘ra, muzokaralar davomida Ahmad al-Shara Rossiyadan sobiq prezident Bashar Asadni Suriya rahbariyatiga topshirishni talab qilgan.

Suriyaning SANA axborot agentligining bugun xabar berishicha, Damashq Rossiyadan “kompensasiya, restavrasiya va rekonstruksiya ishlarini ta’minlash” hamda “o‘tmishdagi xatolar uchun hisob va Suriya xalqining irodasini hurmat qilishni” talab qilgan. Ayni vaqtda Suriya rasmiylari Asadning qaytishini talab qilib, haligacha rasmiy bayonot bergani yo‘q.


Joylangan vaqt : (29 Yanvar 2025 23:00)

Manba: www.aniq.uz
Tavsiya qilamiz
. Яндекс.Метрика