Bir necha kundan beri Rossiyaning «Yantar» kemasi Yevropa Ittifoqi qirg‘oqlari bo‘ylab harakatlanmoqda. Bu kema Rossiya Mudofaa vazirligining Asosiy chuqur suv tadqiqot boshqarmasiga tegishli bo‘lib, razvedka va maxsus tadqiqot uskunalari bilan jihozlangan. U radio va gidroakustik kuzatuv tizimlariga ega bo‘lib, 6000 metr chuqurlikkacha bo‘lgan suv osti va suv yuzasi ob’ektlarini o‘rganish imkoniyatiga ega.
Britaniya harbiylarining ta’kidlashicha, «Yantar» kemasi aniqlangan paytda Buyuk Britaniya qirg‘oqlaridan taxminan 72 kilometr uzoqlikda bo‘lgan. Taxminlarga ko‘ra, u shu hududda Britaniyaning suv osti infratuzilmasi haqida ma’lumot to‘playotgan bo‘lishi mumkin.
Britaniya mudofaa vaziri Jon Xili Rossiya prezidenti Vladimir Putinga murojaat qilib, quyidagicha bayonot berdi:
«Biz sizni ko‘rib turibmiz, nima qilayotganingizni bilamiz va mamlakatimizni himoya qilish uchun qat’iy choralar ko‘rishdan aslo tortinmaymiz.»
Rossiya elchixonasi hozircha bu hodisaga izoh bermagan. Biroq, Rossiya OAV Britaniyaning ayblovlarini «sun’iy bahona» deb atamoqda.
Bu Rossiya kemasining birinchi marta shubha uyg‘otishi emas. «Yantar» nafaqat Boltiq dengizida, balki Atlantikada ham suv osti kabel tarmoqlari yaqinida kuzatilgan.
So‘nggi marta kema uch kun oldin Daniya hududiy suvlari yaqinida ko‘rilgan. NATO davlatlari hozircha uni kuzatishda davom etmoqda.