AQSh mudofaa vaziri Pit Hegset Shtab boshliqlari birlashgan qo‘mitasining sobiq raisi general Mark Millini qo‘riqchilar va boshqa imtiyozlardan mahrum qildi. Bu haqda CNN Pentagondagi manbalariga tayanib xabar berdi.
Generalga qo‘riqchilar Eron AQSh Harbiy-havo kuchlarining aviazarbasi oqibatida o‘ldirilgan general Qosim Sulaymoniy uchun qasos olishini e’lon qilganidan keyin tayinlangan edi.
Shuningdek, Millining Pentagondagi portreti olib tashlanadi, unga berilgan ruxsatnomalar bekor qilinadi va harbiy rahbarning xatti-harakatini o‘rganish bo‘yicha amalga oshiriladigan tergov natijalariga ko‘ra, uning unvoni pasaytirilishi mumkin.
Milli Tramp tomonidan 2018 yilda lavozimga tayinlangan. The Washington Post’ning yozishicha, Tramp prezidentligining oxirgi oylarida general xitoylik hamkasbi Li Tszochen bilan ikki marotaba bog‘lanib, uni AQSh Xitoyga hujum qilish niyatida emasligini, shunday bo‘lgan taqdirda, bu haqida ogohlantirishiga ishontirgan.
General AQSh Xitoyga zarba berishga tayyorlanayotgani va shuning uchun Pekin birinchi navbatda hujum qilishi mumkinligi haqidagi razvedka ma’lumotlariga tayanib, shunday yo‘l tutgan.
Ushbu maqoladan keyin Milliga qarshi davlatga xiyonat ayblovlari yangradi, shunga qaramay, rasman jinoyat ishi qo‘zg‘atilmadi. AQShning sobiq prezidenti lavozimdagi oxirgi kunida — 2025 yil 20 yanvar kuni Millini oldindan afv etdi.
2023 yilda lavozimdan ketgunga qadar Milli to‘rt yil davomida AQSh Shtab boshliqlari birlashgan qo‘mitasiga raislik qilgan. Tramp, shuningdek, sobiq davlat kotibi Mayk Pompeo va uning sobiq maslahatchisi Brayan Hukni ham qo‘riqchilardan mahrum qilgan.