Anqarada Turkiya – O‘zbekiston – Ozarbayjon uch tomonlama mexanizm doirasida 2-uchrashuv bo‘lib o‘tdi. Tadbirda tashqi ishlar, savdo-iqtisodiyot va transport vazirlari ishtirok etdi.
Ozarbayjon tashqi ishlar vaziri Jayxun Bayramov O‘rta yo‘lakni rivojlantirish orqali hamkorlik uchun qo‘shimcha imkoniyatlarga ega bo‘lish mumkinligi haqida so‘zladi. Shuningdek, yanada kengroq mintaqa, xususan Yaqin Sharq va Afg‘onistonda tinchlik, xavfsizlik va taraqqiyotni qo‘llab-quvvatlash uchun mavjud salohiyatdan foydalanish zarurligini ta’kidladi.
Turkiya TIV rahbari Xoqon Fidan sheriklikni mustahkamlash uchun yo‘l xaritasini tayyorlanayotganini ma’lum qildi.
Shu kuni Prezident Rejep Tayyip Erdog‘an O‘zbekiston va Ozarbayjon tashqi ishlar vazirlari Baxtiyor Saidov va Jayxun Bayramovni qabul qildi.
Uchrashuvda iqtisodiyot, savdo va transport vazirlari ham hozir bo‘lgan.
Tashqi siyosat idoralari rahbarlarining chiqishi davomida quyidagi masalalar muhokama qilindi:
Energetika sohasida qo‘shma loyihalar;
Qabul qilingan ”Yo‘l xaritasi” asosida transport sohasida uch mamlakat ishtirokida qator qo‘shma tashabbuslar;
O‘rta yo‘lak Osiyo va Yevropa o‘rtasidagi savdoning eng ishonchli va iqtisodiy yo‘li sifatida;
Suriyaning barqarorligi va taraqqiyoti mintaqaviy barqarorlik va xavfsizlik garovi bo‘lib, logistika, transport, savdo va energetika sohalarida yangi imkoniyatlar ochadi;
Uch tomonlama mexanizmning uchinchi yig‘ilishi Bokuda bo‘lib o‘tadi.
Mamlakatimiz vakili B.Saidov quyidagi takliflarni bildirdi:
TransAfg‘on temir yo‘li global ta’minot zanjirining bir qismiga aylanadi;
Uch mamlakat o‘rtasidagi hamkorlik yangi transport yo‘laklari yaratilishiga xizmat qiladi.
Uchrashuv yakunida imzolangan Anqara deklarasiyasi, jumladan, quyidagilarni nazarda tutadi:
Iqtisodiyot, savdo, investisiya, logistika, infratuzilma, raqamlashtirish, atrof-muhit va iqlim o‘zgarishi kabi muhim sohalarda to‘liq salohiyatni ochish majburiyati;
O‘rta koridorning samaradorligi va raqobatbardoshligini oshirishga chaqirish;
Markaziy Osiyoda barqarorlikni ta’minlashning asosiy omili hisoblangan Afg‘oniston xavfsizligi va rivojlanishiga TDT doirasida yagona yondashuv muhimligini ta’kidlash;
G‘azo sektorida o‘t ochishni to‘xtatish haqidagi e’lonni olqishlab, sulhga rioya etilishini talab qilish.