Latifalar

Kollej bitiruvchisi diplom oldi. Diplomni arqonga bog‘lab, asfaltni o‘rtasida sudrab ketyapti.
Hamma hayratda. Bir shofyor:
— Ha, ukam nimaga diplomni ergashtirib yuribsan? - dedi.
— Men buni orqasidan 3 yil yurdim, bu ham meni orqamdan yursin-da endi, - deya javob berdi.

Afandining buzog‘i bo‘shalib ketib, yoyig‘liq turgan g‘o‘zani yeya boshladi. Afandi buzoqni quvlagan edi, u tutqich bermay shataloq otib ketdi. Afandi borib, bog‘liq turgan sigirni kaltaklay boshladi. Afandining xotini uning qo‘lidan kaltakni tortib olib:
— G‘o‘zani yegan buzog‘u, sigir bechorani nega urasiz?— dedi.
— Suv boshidan loyqa, bolasiga tarbiya bera olmagan, arqonini uzib, g‘o‘za yeyishni bolasiga onasi o‘rgatgan, ayb sigirda, — dedi Afandi.

Xaridor: — Mana bu sut kimniki?
Sotuvchi ayol: — Meniki
Xaridor: — Sigirniki yo‘qmidi?

— Erim yo‘qolib qoldi. O‘rtoq militsioner erimni shu bugunoq topib beringlar. Men erimni sevaman, erimsiz dunyo ko‘zimga qorongu. Topinglar, qidiringlar erimni
— Xonim, sal o‘zizni bosib oling. Bir boshidan ayting, eriz qachon yo‘qoldi?
— Bir haftacha bo‘ldi yo‘qolganiga, shu bugunoq topasizlarmi?
— Nimaga aynan bugun topishimiz kerak?
— Bugun erimni oylik oladigan kunida - debdi.

Bir kuni shifokor ruhiy kasallarni tekshirgani kelibdi. Bir bemor poyafzalni qo‘liga olib, “Tuzik qara, bizni tekshirgani shifokor kelibdi”, - deb turgan ekan, shifokor shu bemorning yoniga kelib:
— Sen nega it bilan gaplashib o‘tiribsan, - deganda
— Doktor bu it emas poyafzal-ku, - deb javob beribdi.
Shifokor xursand bo‘lib:
— Nega bu insonni bu yerda olib o‘tiribsizlar? Axir u soppa-sog‘-ku.
Bemor poyafzaliga qarab:
— Tuzik ko‘rdingmi bizning gapimizga shifokor ishondi - deb xursand bo‘libdi.

Buvi:
— Bolajonim, yo‘talganingda, og‘zingga qo‘lingni tutib tur, ho‘pmi?
Nabira:
— Qo‘rqmang, buvijon, mening tishlarim siznikiga o‘xshab chiqib ketmaydi.

Baliq daryoga cho‘milishga borib, cho‘kib o‘lib qolibdi.

Afandi bilan Vali bir boynikiga ziyofatga borgan ekan. Ziyofat chog‘ida Afandi ko‘z qiri bilan Vali tomon qarasa, Vali sekin tilla qoshiqni kostyumining ichki cho‘ntagiga solayotgan ekan.
Afandi biroz fursat o‘tkazib, o‘rtoqlar "men fokus ko‘rsatmoqchiman", deb hammani o‘ziga qaratib, davom etibdi:
"Hozir mana bu qoshiqni shundoq cho‘ntagimga solib, Valini cho‘ntagidan chiqarib beraman", - degan ekan.

Afandi kasal bo‘lib tabibga borgan edi, g‘oz sho‘rva ichishni buyurdi. G‘oz sotib olishga qurbi yetmaganidan Afandi yelkasiga kamalakni osib, beliga ikkita nonni tugib, ko‘lga g‘oz ovlagani bordi. Qarasa, ko‘lda g‘oz ko‘p, biroq u kechgacha urinsa ham, bironta g‘oz ovlayolmadi. Nihoyat charchab, och qolib ko‘lning suviga non botirib yeya berdi. Shu vaqt bir ovchi kelib:
— Ha, Afandi nima qilib o‘tiribsiz!—so‘radi.
— G‘oz sho‘rva ichayotibman,— javob berdi Afandi.
— Go‘shti qani, yo‘q-ku?
— Go‘shtini tuzlab patiga o‘rab qo‘ydim, huv, ana!— deb uchib ketayotgan g‘ozlarni ko‘rsatdi Afandi.

Qiz onasi bilan doktorga boribdi. Doktor qizga:
— Yechining, tekshiramiz, - desa
Qiz:
— Men emas, oyim kasal, - desa
Doktor:
— Qani opajon og‘zingizni ochib: "A-A-A" - dengchi dermish.

Afandining bir savdogar oshnasi uning tilla uzugiga suqlanib yurar edi.
— Afandi,— dedi u bir kuni — men sizni tez-tez ko‘rib turmasam sog‘inib qolaman. Uzoq safarga ketyapman, qo‘lingizdagi uzugingizni bersangiz, taqib olsam, qachon uzukni ko‘rsam, sizni ko‘rgandek bo‘lib yuraman.
Afandi uzukni berishga ko‘zi qiymay, javob berdi:
— Jon birodar, men ham sizni tez-tez ko‘rmasam turolmayman, qo‘ying, uzuk menda tursin, qachon uzukka ko‘zim tushsa: «Do‘stim tilaganda bermagan edim» deb sizni eslab yuraman.

Maktabga yangi o‘qituvchi kelibdi. O‘quvchilar uning atrofini o‘rab olib, o‘z maktablari, sinflari haqida beto‘xtov gapira ketishibdi. Sinfdoshlar orqa partada o‘tirgan o‘quvchini ko‘rsatib, o‘qituvchiga tanishtirishibdi:
— Manavi Boltavoy-tentak bo‘ladi.
Mana unga 500 so‘mlik va 1000 so‘mlik pulni bersangiz u doim rangi qizil bo‘lgani uchun 500 so‘mlikni oladi.
Bolalar Boltavoyni chaqirib, o‘qituvchiga namoyish qilish uchun 500 so‘mlik va 1000 so‘mlik pul uzatishibdi. Boltavoy haqiqatdan ham 500 so‘mlikni tanlabdi. Darslar tugagach, o‘qituvchi Boltavoyni kabinetiga chaqiribdi va debdi
— Boltavoy, qarasam — matematikani unchalik yaxshi bilmaydiganga o‘xshaysan. 1000 so‘m 500 so‘mdan ikki barobar ko‘pligini nahotki bilmasang?!
— Albatta bilaman!
— Unda nega 500 so‘mlikni tanlaysan?
— Muallim, agar men 1000 so‘mlikni tanlasam, bolalar menga pul bermay qo‘yishadi-da!

Bir odam uyiga yolg‘on gapirsa uradigan robot olib kelibdi. O‘sha kuni o‘g‘li kech kepti, otasi qayerda yuribsan, - desa.
— O‘rtog‘im bilan dars qildik, - degan ekan
Shu gapdan keyin robot bolani urib ketibdi.
Buni ko‘rgan onasi otasiga qarab:
— Bo‘ldi to‘xtating dadasi, o‘zizni o‘g‘lingiz-ku, - desa
Robot to‘xtab, onasini urib ketibdi.

Ona besh yashar o‘g‘liga tanbeh berdi:
— Hadeb sakrayvermagin, qorning qatta bo‘lib qoladi!
Bola ko‘chaga chiqsa homilador ayol turibdi. Sekin yoniga kelib dedi:
— Ana shunday bo‘ladi, kamroq sakrash kerak edi.

Internet orqali yozma suhbat:
— Isming nima?
— Tumanoy.
— Boshing bilan klaviaturaga urilib ketdingmi, yoki rostdan ham shunaqa ism bormi?
— Bor, ishonmasang ana ism.uz dan ko‘r.

"Odno"da sevishib qolganlarni telefondagi suhbati:
— Salom, siz "odno"dagi "Jajjigina qizaloq adasini erkasi" misiz???
— Ha, menman(past ovozda pichirlab)
— Men, Farhod akangizman tanidingizmi? Telyefon nomeringizni bergandiz.
— Tanidim(pichirlab)
— Nega pichirlab past ovozda gapirayapsiz???
— Voy, yonimda nevaram uxlayotgandi, uyg‘onib ketmasin, - dermish

Bir odam kechki ziyofatdan mast bo‘lib kelib uxlab qolibdi. Ertalab derazasi taqqillarmish. O‘rnidan turib mastlikda deraza deb ko‘zguni oldiga borib:
— Senga nima bor? Bor yo‘qol alkash, - dermish.

Bir bangi tolni salqinida pista chaqib o‘tirgan ekan, qo‘lidan bir dona pista yerga tushib ketibdi. Shunda haligi bangi pistaga qarab:
— Ey, yonimga kel, - debdi.
Lekin pista joyidan qimirlamabdi.
Shunda bangi:
— Ey, yonimga kel deyabman, - debdi.
Lekin pista joyida turoveribdi.
Shundan keyin haligi bangi 5-6 ta pistani yerga sochib:
— Hoy, menga anavi pistani ushlab kellaring, - debdi.

Uch botirni otasi, bolalarini uylamoqchi bo‘lib:
— Boringlar, o‘zlaringa qayliq topinglar, - debdi
Uch o‘g‘lon yo‘lga chiqibdi va kattasi bir qizni ko‘rib:
— Sizlar ketaveringlar, men shu yerdan qaytaman, - dyebdi
Ikkinchi o‘g‘lon yo‘lga tushibdi. Ikkinchi o‘g‘il ham bir qizni ko‘rib, u ham:
— Sen ketaver men ham, shu bilan qaytaman, - debdi
Kichik botir yo‘lida davom etibdi, juda ko‘p qizlarni ko‘ribdi. Har qiz chiqqanda:
— Sendan zo‘ri chiqadi, - dermish.
Toqati toq bo‘lgan oti, bir qizni ko‘rib:
— Sen ketaver, men ham shu yerdan qaytaman, - deb gapirib yuboribdi.

Bir yigit og‘aynisini uyida ujas kino ko‘rib turib, soatiga qarasa 23:55mish.
— Kech bo‘lib ketibdi-ku, og‘ayni meni katta yo‘lgacha kuzatib qo‘ysangchi, - debdi.
Yarim yo‘lga yetmaslaridan mehmon tomda turgan sharpani ko‘rib qolibdi. Sharpa huddi qiz bolaga
o‘xsharmishu, yuziga qanaqadir nur tegib turganmish. Mehmon:
— Og‘ayni orqaga qaytamiz, qara tomni tepasida vampir bor ekan, - desa
Og‘aynisi tomga qarab:
— Bu vampir emas, qo‘shnimizni qiziku. Telegram'ga kiraman deb antenna qidiryapti, - dermish

<< < 25 26 27 28 29 30 31 > >>

Jami 2090 ta latifa mavjud

Tavsiya qilamiz

Bosh sahifa