Oʻchirib tashlanglar... (hajviya) [Habib Siddiq]

Oʻchirib tashlanglar... (hajviya) [Habib Siddiq]

Kunlardan bir kun Quyonboy ilmiy maqola bitdi. –Bir koʻrib bersangiz, soʻngra e’lon qilsak, – dedi u Tulkixonning huzuriga borib ta’zim qilarkan. Tulki maqolaga bir koʻz yugurtirib chiqdi, u yer bu yeriga qalam urdi, soʻngra Quyonning ismi-sharifi oldiga oʻzinikini ham qoʻshib qoʻydi. Keyin maqolani olib Boʻrining huzuriga joʻnadi. –Quyon bilan hamkorlikda bir ilmiy maqola yozgandik, Boʻriboy ogʻa. –Hmm, – dedi Boʻri maqolaning u yer-bu yerini oʻqigan boʻlib. – Shuni sizlar yozdinglarmi? –Ha, Boʻriboy ogʻa. –Ancha yangi gaplar bor ekan-da. Buni ikkalalaring aytgandan koʻra, birgalikda aytganimiz yaxshi. Menga qoldirib ketaveringlar. –Assalomu alaykum, ustoz, – dedi ertasi kuni Boʻri Arslontoʻra huzuriga ta’zim qilib kirib. – Biz koʻplashib bir ilmiy maqola bituvdik. Shuni bir muborak nazarlaridan oʻtkazib olsak, deb keluvdim. Arslon yonboshlab olib maqolani astoydil oʻqishga tushdi. Goh bosh irgʻab allanimalarni ma’qulladi, goh boshini tushunarsiz chayqab qoʻydi. Oxiri xursandligini yashirmadi. –Yashang, Boʻriboy, juda ajoyib maqola ekan. Lekin bu yerda mening ismi-sharifim yoʻq-ku? –Albatta boʻladi, shunga sizning roziligingizni olgani keluvdik-da? –Mayli roziman. Maqolani oʻzimizning ilmiy jurnalda chop ettiramiz. Faqat shunday ajo yib maqolani yozgan allomalar orasida anavi tirrancha Quyonning familiyasi nima qilib yuribdi. Oʻchirib tashlanglar.

Muallif: Habib Siddiq