Фикр (ҳикоя) [Hiyam al-Muflih]

Фикр (ҳикоя) [Hiyam al-Muflih]

Бир куни «С»нинг миясига бир фикр келди. Ўйлаб қараса, у ҳали унча шаклланмабди. У бу фикрнинг баъзи бурчаги-ю қирғоқларини, баланд-пастлигини текислашни, пойдеворини мустаҳкамлашни хоҳлади. Бироқ дангасалик унинг эрка ақлини карахт қилиб қўйди ва томирларида эснагандай оқа бошлади. У фикрини қўлига олиб, маълум бир пайтгача сақлаб қўйиш учун музлатгичда музлатиб қўйишга қарор қилди. «С»нинг ёнида «А» исмли бир киши ўтаётиб, унинг олдида эътиборсиз ағдарилиб ётган фикрини сезиб қолди. У қўлга киритмоқчи бўлди-да, эгасидан сўради. «С» каромат кўрсатиб, бу фикрни унга совға қилди. Шундай қилиб, у «А»нинг мулки бўлиб қолди. «А» бу фикрга анча пардоз берди. У моҳир тадбиркор тожир эди. Фикрларни қандай қилиб сотишни билар эди. Сотувга тайёр бўлганида ўз дўконига қўйиб қўйди. «Ж» исмли мижоз уни сотиб олиш мақсадида роса синчиклаб у ёғ-бу ёғини кўрди, ундан ҳайратга тушиб сотиб олди. Чунки у оптимист киши эди. У фикрни ярқироқ рангларга бўяб, унинг бўйнига ипак лента илиб, уйининг ўзи энг яхши кўрган бурчагига илиб қўйди. Ҳар куни эрталаб унинг қаршисида қаҳва ичаётганда кўзлари шод-хуррамликка тўлар, чеҳрасида табассум пайдо бўлар эди. У мана шу билан ҳар кунга оддий кулранг кунининг булутларини ҳайдар эди. Бундан «М» исмли ҳамкасбининг жаҳли чиқар, ғазабланар эди, чунки у доиман пессимист эди. Ҳар сафар уникига келганида «қани, энди буни менга берса эди» деб қўлга киритишни хоҳларди. Тиқилинч қилиб сўрайвергач, ундан хижолат тортиб, унинг хоҳишини қондирди. У аслида дўстининг тушкунлик гирдобидан чиқишига ва кунларини хурсандчилик ва оптимистлик алвонлари билан безашига ёрдам бериб, ўз кўнглини хотиржам қилмоқчи эди. Чунки «М»нинг ўзгариши жуда қийин эди. У барча безакларини ечди, ялтироқларини ўчирди. Қатл этувчи қора рангга бўяди, сўнг уни эритди ва... ўқ ҳажмидек қолипга қуйди. Қаерга борса, уни бармоқлари ўйнаб, қўлларида тумордек кўтариб юрди. Бир куни... у туморини қаердадир унутиб қолдирди. Уни бир оч дайди ўғирлабди. У ўзига тўқ, эрка яшаётган бир кишига ҳасади ошиб уни ўлдиришни режалаштириб юрар эди. У ўғирлаган қора ўқни тўппончасига жойлади, сўнг уни ўша киши томон мўлжаллаб отди ва қочиб кетди. Эрталаб газеталар қуйидаги хабарни босиб чиқарди. Жаноб «С»нинг жасади топилди, у миясига отилган қора ўқдан ўлган.

Muallif: Hiyam al-Muflih