Latifalar

Bir kuni podshoh xizmatkorlarini chaqirib debdi:
— Sizlarga bir kun muhlat. Agar ertaga gapiradigan qushni topib kelmasanglar, hammangizni jazolayman!
Xizmatkorlari nima qilishini bilmay, tuni bilan chora izlashibdi. O'ylab-o'ylab, afandiga murojat qilishibdi. Afandi:
— Aslo qayg'urmanglar. Menda chora bor, - debdi.
Ertasi kuniga shoh saroyiga katta qora qarg'a bilan afandi kirib kelibdi. Buni ko'rgan xizmatkorlar jonlaridan umidini uzib turishsa, shoh qarg'aga qarab:
— Manavi odam karmi? - deb xizmatkorlaridan birini ko'rsatibdi. Shunda qarg'a "Karrr" desa, podshoh quvonib:
— Ana bo'larkan-ku! - dermish.

Bola o'rtog'iga norozi bo'lib dedi:
— Itim senga yoqmadimi? Nega unga aftingni qiyshaytiryapsan?
— Avval o'zi boshladi-ku!

Afandining uyiga o'g'ri kirgan ekan. Afandi sandiq ichiga berkinib olibdi. O'g'ri uyni axtarib, qo'lga kirgudek hech narsa topmay, sandiqni ochib qarasa, Afandini ko'rib qolibdi. O'g'ri:
— Sandiqning ichida nima qilib yotibsiz?— desa, Afandi:
— Uyda senbop hech narsa yo'q, shunga xijolat bo'lganimdan berkinib oldim,— degan ekan Afandi.

O'qituvchi bolalarga oy haqida hikoya qildi:
— Oy juda katta sayyora. U erda milliondan ziyod odamlar yashashi mumkin.
— Menda bir savol bor, - dedi bir o'quvchi.
— Xo'sh, nima deysan?
— Oy yarimta bo'lib qolganda odamlar qanday sig'ishadi?

— Dugonajon, kecha erim meni xafa qildi.
— Nega? Nima bo'ldi?
— Go'zallik saloniga 300 ming so'ragandim.
— Bermadimi?
— Menga tikilib qarab turdi-da, 500 ming berdi!

Kunlarning birida xo'roz tovuqni restoranga taklif qilibdi.
Restoranda ofisiant:
— Nima buyurasizlar? - desa, xo'roz:
— Menga bitta grill, tovuqga esa to'rtta qaynatilgan tuxum olib keling, - dermish.

Har kuni ichib, mast bo'lib yuradigan odamdan so'rashibdi:
— Nega har kuni aroq ichasan?
— Unutish uchun, - debdi.
— Nimani unutish uchun?
— Aroqxo'rligimni unutish uchun!

Ikki yaqin dugonalar suhbatlashmoqda:
— Eshitishimcha, yigiting bilan ajralishibsizlar...?
— Ha!
— Nima bo'ldi? Orangizdan biror gap o'tdimi?
— Masalan sen, har kuni ichadigan, tinimsiz chekadigan, so'kinib gapiradigan va hatto qo'l ko'taradigan odam bilan birga yashay olarmiding?
— Yo'q, albatta!
— U ham bunga chiday olmadi.

Afandi bir joyda to'y bo'lyapti deb eshitdi, garchi taklif qilinmagan bo'lishiga qaramay, to'yga juda ham borgisi kelibdi. O'ylab-o'ylab bahona topibdi. Bir varaq qog'ozni to'rt buklab, cho'ntagiga solibdi-yu, to'yxonaga otlanibdi. To'y egasiga borib:
— Sizga qozidan xat,— deb qog'ozni beribdi. To'y egasi quvonib, xatni olib, Afandini to'yxonaga kirgizib to'rga o'tkazibdi. Afandi esa vaqtdan foydalanib, dasturxondagi nozi-ne'matlarni bir boshdan eya boshlabdi.
To'y egasi qog'ozni ochib qarasa, bo'm-bo'sh.
— Qog'ozda hech narsa yozilmagan-ku! - debdi afandining yoniga borib.
— Ishlari zarur bo'lgani uchun qog'ozga xat yozishga qo'llari tegmadi,— dermish Afandi.

Uch yashar Sardor buvisiga dedi:
— Buvijon! Siz doimo: «Shakarning ham ozi shirin», - derdingiz. Bog'chaga shuncha bordim, bo'ldi-da endi!

<< < 733 734 735 736 737 738 739 > >>

Tavsiya qilamiz

Bosh sahifa