Қабулхонада (ҳажвия) [Safar Kokilov]
![Қабулхонада (ҳажвия) [Safar Kokilov]](http://uzsmart.ru/kutubxona/asarlar/qabulhonada-hajviya-safar-kokilov/qabulhonada-hajviya-safar-kokilov.jpg "Қабулхонада (ҳажвия) [Safar Kokilov]")
| Қабулхонада (ҳажвия) [Safar Kokilov] |
| Эшигига «ҳакимлар хонаси» деб ёзилган хонада навбатчи дўхтур креслога ястаниб олганича берилиб телевизордан футбол ўйинини томоша қиляпти. Асабийлашиб тез-тез сигарет чекаверганидан хона ичи тутунга тўла. Ўйин авжида. Дўхтур ҳар замон «ҳа бўл, чоп, теп» деб қийқириб қўяди. Хонага кириб келган ҳамширага эътибор ҳам бермайди. - Дўхтур, ҳой, дўхтур. Қабулхонага бемор келди. Нима қилай? Дўхтур икки кўзи телевизорда, қўл силтайди. - Ўтқизиб қўй. Сўнг... ҳа, ҳа, ур, ур... - Бемор қўшни тумандан экан. - Ошир деяпман, ошир. Ҳа, теп. Унда ётқизма. Ўзларига бориб ётсин... - Дўхтур, беморни ўзимизнинг тез ёрдамда олиб келишди-да. Бизнинг туманга меҳмонга келиб касалланиб қолганмиш. - Ундай бўлса, ётқиз. Ҳе, калланг қурсин. Қаёққа тепаётибсан?.. - Изидан ҳеч ким келмабди. Дори-дармонларнинг ҳақини тўлашга пули ҳам йўқ экан. - Ҳе, унда кутиб тур. Ўтқизма. Текинга қиладиган дори борми унга. Чоп, чоп... - Аҳволи оғирга ўхшайди. Дўхтур, ўзингиз ҳам бир кўрасизми? - Оғир бўлса, ётқизда. Нега қараб турибсан? Теп. Югур. Бор. Бошни қотирма, кўряпсан-ку, бандман, деди дўхтур ҳамширага қараб жеркиниб. Ошир бу ёққа. Ҳамшира чиқиб кетди. Дўхтур бошидаги қалпоғини олиб тиззасига урди. У мухлислик қилаётган команда енгилаётган эди. - Уф-ф. Ўйинни ҳам расво қилишди. Тренерни ҳайдаш керак. Аблаҳлар. Текинхўрлар... Шу пайт яна ҳамшира қиз ҳовлиқиб чопиб кирди ва товушини баландлатиб деди: - Дўхтур, дейман, дўхтур... - Ҳа, нима? Намунча бақирасан? Қўясанми ўзи, йўқми? Бу ёқда ўзи ўйин расво бўлиб турганда... - Дўхтур, бу ёқда бемор ҳам... - Хўш? Нима бўлди? Ўтқиз дедим-ку?! - Бемор ўлиб қолди... - Ҳа, унда ётқизма. Қайтариб юбор. А?! Ўлиб қолди?! - Ҳа, ўлди. Оғайинлари ҳам устига келиб қолишди. Жанжал қилишяпти. Дўхтурни чақир, дейишяпти. Нега биринчи ёрдам кўрсатмади, дейишяпти. Нима қилай? Дўхтур, нима қилай? - Оббо. Бу ёғи ҳам расво бўлибди-ку. Мен-чи? Мен нима қилай? деб дўхтур кўзлари ола-кула бўлиб ўрнидан туриб кетди. Ташқаридан одамларнинг бақиргани, тапир-тупур овозлар эшитилди. - Дўхтур, сиз энди қочинг. Мана бу шкафга киринг... Дўхтур дераза ёнига боради. Ҳамшира бақиради. - Вой, қаёққа? У ёққа эмас, бу ёққа, вой, бу ер иккинчи қават. Дўхтур, ташламанг. Шошманг... Деразадан ташқарида гурсиллаган ва дўхтурнинг «вой-вой»лаган овози эшитилади. Ҳамшира бошини ушлаб бақрайиб қолди. - Вой, ўлмасам. Энди нима қилдим. Уф-ф. Энди дўхтурнинг ўзини ётқизаман, шекилли... Ҳамшира шундай деб ташқарига югурди... |
| № | Eng ko‘p o‘qilganlar |
|---|---|
| 1 | Gʻazallar, ruboylar [Zahiriddin Muhammad Bobur] 72867 |
| 2 | Yulduzlar mangu yonadi (qissa) [Togʻay Murod] 67039 |
| 3 | Sobiq (hikoya) [Said Ahmad] 50986 |
| 4 | Qorakoʻz majnun (hikoya) [Said Ahmad] 48254 |
| 5 | Guliston [Sa’diy] 44679 |
| 6 | Gʻazallar [Nodira] 44073 |
| 7 | Ot egasi (hikoya) [Shukur Xolmirzayev] 33090 |
| 8 | Yulduzli tunlar (I- qism) [Pirimqul Qodirov] 32479 |
| 9 | Мусульманские имена (част... [Ibn Mirzakarim al-Karnaki] 32330 |
| 10 | Hikmatga toʻla olam (gʻazal, ruboiy... [Sa’diy Sheroziy] 27401 |
Tavsiya qilamiz
Tush.UZ - Tushlar tabiri