Latifalar

Vodiydan Toshkentga birinchi martta mehmon bo'lib kelayotgan uch kampir mashinada dovon (pereval)dan o'tib kelayotishsa, haydovchini hazil qilgisi kelib qolibdi:
— Onaxonlar, hozir tepalikka, farishtalarga yaqin joyga chiqib boramiz. Kim-da kim choliga xiyonat qilgan bo'lsa, quloqlari bitib, hech narsani eshitmay qoladi, - debdi.
Kampirlarni quloqlari bitib qola boshlabdi. Shunda kampirlardan biri debdi:
— Juda ko'p xiyonat qilgan bo'lsa kar bo'lib qolmaydimi ishqilib?!

Qimmat mashinada ketayotgan kelishgan ayolni Gai to'xtatib so'rabdi:
— Nega mashinangiz oldida boshqa raqam, orqasida boshqa?
— Oldidagi birinchi telefonim raqami, orqadagisi ikkinchi telefon raqamim, - debdi ayol.

Bir kuni er-xotin urishib qolibdi.
Eri:
— Sen bilan ortiq yashay olmayman. Narsalaringni olgin-da, ota uyingga jo'na! – debdi.
Xotini ketibdi.
Kun kech bo'lgach, eri sekin telefonni olib xotiniga qo'ng'iroq qilib debdi:
— Onasi, boraymi...?!
— Mayli. Faqat bitta shartim bor.
— Ho'sh?..
— Oshxonaga kiring.
— Kirdim.
— Qo'lingizga likopchani olib, uni zarb bilan erga uring!
— Urdim.
— Endi siniqlarini yig'ib, avvalgi holiga keltiring.
— Ie, xotin. Men plastik tarelkani erga urgandim. Singani yo'q...!
— Obbo! Ming yillik rivoyatni rasvo qildingiz. Keling, tezroq olib keting. Ota-onamga birrovga keldim, degandim, - debdi xotini.

Shifokor bemordan so'radi:
— Ho'sh, bugun qanday uxladingiz?
Bemor javob berdi:
— Shu..., tungi ko'ylakda, yalang oyoq, qorong'u xonada uxladim.

Boshqa uyga adashib kirib qolgan sigir nima deyishini bilmay:
“Kechirasizlar, sut olmaysizlarmi?” debdi.

— Kecha erim bilan yana urishib qoldik...
— Opa, siz o'zi ahmoqqa erga tekkansiz!
— Nega erim ahmoq ekan?
— Ahmoq bo'lmasa sizga uylanarmidi!?

Dala o'quv mashg'ulotlariga chiqqan komandir serjantga topshiriq beribdi:
— Men uyquga yotyapman. Uyqudan turganimda dasturxonda quyon go'shtidan qaynoqqina sho'rva bo'lsin! Tushunarlimi?
— Huddi shunday, o'rtoq polkovnik! - javob beribdi serjant.
Bir soat vaqt o'tgach, polkovnik uyg'onib, ne ko'z bilan ko'rsinki, stolga yozilgan dasturxon ustida qaynoqqina sho'rvadan xushbo'y bug' chiqmoqda. Tabiiyki, polkovnik hayron.
— Xo'sh, bunchalik qisqa vaqt ichida quyon tutishga qanday muvaffaq bo'lding? - so'rabdi u serjantdan.
— Muammo bo'lmadi, o'rtoq polkovnik. Atrofga qarasam, allaqanday quyon yugurib yuribdi. Miltig'imni ko'tarib, o't ochdim. Bechora “miyov” deyishga ham ulgurmadi! – dermish serjant.

Er xotiniga debdi:
— Onasi, bugun uyimizga yaqin do'stimni mehmonga chaqirdim.
Xotini:
— Nima? Mehmon? Bola kasal, meni ishlarim boshimdan oshib yotibdi. Uyni ahvoliga qarab bo'lmaydi. Muzlatgich bo'm-bo'sh! Bu kishim mehmon chaqirganmushlar...!
Eri:
— Shuning uchun ham chaqiryapman-da! Do'stim bo'ydoq. Oxirgi payt uylanish haqida ko'p uylayapti. Biznikiga kelib uylangandan keyingi hayotini bir ko'rib ketsin degandim...

Bir odam samolyotda uchib ketayotib, hadeb xudoga iltijo qilarmish:
“Eson-omon etib olaylik!” deb.
Yonidagi yo'lovchi undan so'rabdi:
— Hoy birodar, buncha havotir olasiz? Samolyot yangi, ishonchli! Hech narsa bo'lmaydi, qo'rqmang!
Haligi odam:
— Nuqul men o'tirgan mashina buzilib qoladi, velosipedni baloni teshiladi, poezd ham halokatli to'xtaydi, - deb tursa birdan styuardessa e'lon qilibdi:
— Hurmatli yo'lovchilar! Samolyotimiz tinch okeaniga qulamoqda! Biz sizlarga bittadan qutqaruv jeleti va xushtak beramiz. Xushtakni chalsangiz, sizlarga akula hujum qilmaydi!
Shunda haligi odam yig'lamsirab debdi:
— Hozir menga berishgan xushtak yo chalinmaydigan bo'ladi, yo bo'lmasa menga uchragan akula kar bo'lib chiqadi… Qutqaruv jeletini razmeri topilmasa ham kerak!

''Buzoqni yugurgani somonxonagacha'' degan maqolni eshitgan buzoq umuman yugurmaydigan bo'libdi.

<< < 362 363 364 365 366 367 368 > >>

Tavsiya qilamiz

Bosh sahifa