Latifalar

Er shimini hafsala bilan dazmollayotgan xotinini ko'rib so'rabdi:
— Tinchlikmi onasi?! Bugun chiroyli kiyinib ko'chaga chiqsam, menga qizlar qarar ekan-da...! – desa xotini:
— Dazmollangan, yaxshi kiyingan erkak oilali bo'lishini hamma qizlar bilishadi, - debdi.

— Hozirgi kunda jurnallar yarim yalong'och ayollar rasmiga to'lib ketdi. Bizni davrimizda bunaqa emas edi! – debdi keksa jurnalist.
— Sizni paytingizda kiyim-kechaklar arzon edi-da! – debdi unga muharrirlardan biri.

Rastada turgan pomidorlarni hammasi birma-bir ushlab chiqayotgan xaridorga qarab sotuvchi debdi:
— Hadeb ushlayvermang! Hammasini ushlab chiqganingiz bilan qattiq bo'lib qolmaydi!

Soat 19:00. Ayol eriga Telegram'da yozmoqda:
“Sizga men kerakmanmi yoki o'sha ulfatlaringizmi?!”
Soat 23:00. Er ayoliga javob yozmoqda:
“Albatta sen keraksan!”.

Er-xotin kechki payt salqinda ko'chada aylanib yurishsa, oldidan qo'shnisi chiqib qolibdi.
— Nega bir o'zingiz yuribsiz? Xo'jayin qani? – so'rabdi xotin qo'shni ayoldan.
— Erim to'rt oyoqli do'sti bilan birga... – debdi ayol.
— Ha, it bilan aylanib yuribdimi? – desa, qo'shni:
— Yo'q, yangi divan sotib olgan edik, - dermish.

Er-xotin uyiga yangi lyustra sotib olibdi.
Eri tepaga chiqib, lyustrani o'rnatayotib xotinidan so'rabdi:
— Chiroqni o'chirdingmi ishqilib?!
— Ha, - debdi xotini.
Bir payt xotinini qitmirligi tutib, eri bilan hazillashgisi kelib qolibdi. Sekin erini tovonini tirnoqlari bilan qitiqlasa, eri:
— Voy dod! – deb pastga sakrab tushibdi.
Xotini:
— Ha, nima bo'ldi adasi? – desa, eri:
— Ming la'nat! Chiroqni o'chirdim deganding, tok urib tovonimgacha zirillatvardi! – dermish.

— E'lon yozib qo'ying! Payshanba kuni ota-onalar majlisi!
— Payshanba yoziladimi? Payshamba yoziladimi?
— Juma deb yozaqoling! Faqat bir kun oldin kelish shart!

Bir kishi qarindoshinikiga bormoqchi bo'lib, yo'ldan adashib qolibdi.
Manzilni so'rash uchun qarindoshiga qo'ng'iroq qilaman deb, adashib do'stiga qo'ng'iroq qilib yuboribdi. U do'sti hazilkashroq ekan.
— Allo, uyingni topa olmayapman... – desa, do'sti hazillashib:
— Qaerda turibsiz? – debdi.
Mehmon:
— Mozorni oldidaman. Qaerga yuray? – desa, do'sti:
— Ichkarida yotibman, kiravering! – dermish.

Oltin baliq tutib olganimda “Hamisha pulga ko'milib yuray”, deb tilak bildirgandim. Shundan beri inkassator bo'lib ishlayapman. Maoshim ozligini aytmasa, tilagim to'la amalga oshdi.

Desantchilar parashyut bilan o'quv-sakrash mashqlarini bajarishmoqda. Hamma vertolyotdan sakray boshlabdi. Bortda faqat bitta oddiy askar va praporshik qolibdi. Oddiy askar sakrashga hozirlanayotgan praporshikni to'xtatibdi.
— O'rtoq praporshik, onamning aytishicha, oxirgi bo'lib sakragan kishining parashyuti ochilmas emish.
— Bema'ni gap!
— Shunday bo'lsa ham, oxirgi bo'lib sakrashni istamayman.
— Yaxshi, - debdi praporshik, - Sakra. Oxirgi bo'lib o'zim sakrayman.
Askar sakrab, havoda asta pastlab borayotsa, yonidan parashyuti ochilmagan praporshik baqirib tushibdi:
— Ha, o'sha onangni!!!...

<< < 380 381 382 383 384 385 386 > >>

Tavsiya qilamiz

Bosh sahifa