Qaytgan duo (hajviya) [Habib Siddiq]

Qaytgan duo (hajviya) [Habib Siddiq]

Bahodirjon degan hazilkash ulfatimiz bor. «Eshon aka» deb hazillashib yuramiz. Bir gal paxta yigʻim-terimiga chiqishganda brigada boshligʻi depti: — Mana shu traktorchimiz ja-a yaxshi yigit-u, kelin bilan oralari chatoq boʻlib qolib, sal xafa boʻlib yuripti-da. Eshon aka, bir duo qiling, zora kelinning koʻngli ilib... — Quruqdan-quruq qanday boʻlarkan?.. — E-e, Eshon aka, ertaga eriydi-da! Bahodirjon uzundan uzoq duo qilibdi. Traktorchi xursand boʻlib ketibdi-yu, ertasiga qovoq-tumshugʻi osilib qaytib kelibdi. — E-e, duoyingiz oʻtmas ekan... — Siz mendan xafa boʻlmang, — debdi Bahodirjon quvlik bilan, — oʻzim ham kechasi bilan uxlolmay chiqdim. — Nega?.. — Yigirma yil avval olamdan oʻtgan otam tushimga kirib, «Shu yoshga kirib ham aqling kirmadimi, nega aytganimni qilmaysan. Mana, qilgan duoying egasiga borib qaytib keldi», dedilar. — Rostdan-a? — Ha-da!.. «Qaysi gapingizni bajarmadim, dada», desam: — Bolam, nasiyaga duo qilmagin, degandim-ku, — deydilar-a.

Muallif: Habib Siddiq