Latifalar

Bir kishi dengizdan tilla baliq tutib olibdi. Baliq tilga kirib:
— Meni qo‘yib yuborsang, uchta tilagingni amalga oshiraman!, - debdi.
— Roziman. Faqat bitta shartim bor! Menga nima bersang, qaynonamga uch baravar ko‘proq berasan, - debdi haligi odam. Baliq ham shu shartga ko‘nibdi.
— Menga bitta mashina, qaynonamga esa uchta mashina ber. Menga bitta dalahovli ber, qaynonamga — uchta. Uchinchi tilagim: menga kichkinagina yurak xuruji, qaynonamga ...

— Bitta yo‘llanmaga butun oila dam olishi mumkinmi?
— Mumkin, agar yo‘llanma qaynonaga berilsa.

Bir qiz internetda o‘tirgan ekan, qo‘shni xola kirib:
— Qachon qarasam shu kompyutering oldida o‘tirasan. Nima qiziq narsalar bor bu yerda?, - deb so‘rab qolibdi.
Qiz esa:
— Internetdagi "Google" ni sizga tushuntiraman. Mana qarang, nimani xohlasangiz topib beradi, - debdi.
Qo‘shni ayol ham qiziqib:
— Nima so‘rasam hamma-hammasini topib beradimi?
— Ha, xamma narsani topadi. Xohlasangiz mana yozib, izlab ko‘ring.
Qiz klaviaturani qo‘shni xolaga berib, o‘zi choy damlab kelib qarasa, ekranda shunday yozuvlar turgan ekan:
"Assalomu alaykum hurmatli Gugl aka! Iltimos, menga erimning jazmani qayerda yashashini topib bersangiz!"

Qahraton qish kunlarining birida, ko‘chada qalin qor yog‘ib, kuchli bo‘ron esayotgan ekan. Bir kishining eshigi taqillab qolibdi. Qarasa, eshik oldida sovuqdan muzlab qolgan go‘zal ayol turgan emish. Uy egasi uni ichkariga taklif qilibdi. Ayol:
— Muzlab qoldim, - debdi.
Haligi kishi ayolni olov yoniga taklif qilibdi.
— Baribir isimayapman, - debdi ayol yana.
Ayolni issiq kiyimlari bilan o‘rab, qaynoq choy bergan kishi, - endi-chi?, - debdi.
— Bunday vaqtlarda rahmatli erim meni quchoqlab, tanasi bilan isitib qo‘yardi, - deb erkalana boshlabdi ayol.
Uy egasi esa:
— Ko‘chada qalin qor yog‘ib, kuchli bo‘ron ko‘tarilgan. Bunday havoda eringizni tanasini olib kelolmayman, - degan ekan.

Bir kishining xotini vaznini o‘lchamoqchi bo‘lib tarozi ustiga chiqibdi-da, semiz qornini ichiga torta boshlabdi. Buni ko‘rgan er:
— Ovora bo‘lma xotin, baribir vazning kamayib qolmaydi, - deb kulibdi.
Xotini esa eriga qarab:
— Hech bo‘lmasa tarozi nechini ko‘rsatayotganiga qarab olay!, - debdi.

Rahbar kotibasiga:
— Qahva keltir!
Kotiba:
— Qahvani Braziliyadan keltirib bo‘lishgan. Men sizga uni tayyorlab berishim mumkin.
Rahbar:
— Shu aqlingni imtihonda ishlatganingda, hozir qahva tashib yurmasding!

— Bugun ertalab juda barvaqt turdim. Hiyobonda yugurib yursam, qarshimdan o‘zga sayyoralik chiqib qoldi.
— Qo‘ysang-chi! Hech ham ishonmayman, seni barvaqt turib, yugurganingga!

Bir odam taqdir taqazosi bilan qamoqqa tushib qolibdi. Qamoqda uni soqchi biqiniga urib, turtib olib ketayotsa, haligi odam:
— Sekin, hoy ukam sekinroq. Avval muomalangizni to‘g‘rilab oling. Bunaqada hech kim kelmay qo‘yadi bu yerga, - dermish.

Bir yosh qiz do‘konga kirib, har xil buyumlar xarid qilibdi. Hamma narsalarni bir donadan sotib olayotsa, sho‘x yigit gap "otibdi":
— Yaxshi qiz, bir o‘zingiz yashaysizmi?
Qiz viqor bilan:
— Ha, qayerdan bildingiz?, - desa,
— Juda-yam xunuk ekansiz-da..., - dermish.

Bir shaharlik olifta yigit coch qo‘yib, tor futbolka, tor shim kiyib, qulog‘iga zirak ham taqib olibdi-da, qishloqqa mehmonga boribdi. Ketayotsa, oldidan qari otaxon chiqib qolibdi. Yigit otaxonga calom beribdi. Otaxon alik olib, yigitga qarab turibdi-da:
— Barakalla, baxtli bo‘l qizim, - debdi.

— Itingizni dumini nega kesib tashladingiz?
— Qaynonam kelganida dumini likillatganiga chiday olmadim.

— Eshitishimcha, uylangan emishsan.
— Ha, ko‘chadagi oshxonalarda ovqatlanib yurish yoqmayotgan edi.
— Endi-chi?
— Endi yoqyapti.

Bir odam sigirini sotmoqchi bo‘lib bozorga olib kelibdi. Xaridor so‘rabdi:
— Sigiringiz sersutmi?
— Ha, suti yaxshi. Ammo bitta kamchiligi bor.
— Qanaqa kamchilik ekan?
— Sog‘ilayotganda qattiq tepadi.
— Hechqisi yo‘q, sigirni xotinim sog‘adi.

Katta bir korxonaning rahbari ishchilar intizomini tartibga solib qo‘ymoqchi bo‘libdi. Ishyoqmas, dangasa biror xodimni ishdan bo‘shatib, qolganlarga namuna ko‘rsatib qo‘yish niyatida tekshiruvga chiqibdi. Qarasa, bir yosh ishchisi korxona hovlisida devorga suyanib, dam olib turgan ekan. Rahbarning fig‘oni falakka chiqibdi. Yosh yigitning yoniga kelib:
— Senga bir haftada nechi pul to‘lashadi?, - deb so‘rabdi jahl bilan.
— Olti yuz ming, - javob beribdi hayron bo‘lib.
Rahbar boshqalarga ham o‘rnak bo‘lsan degan maqsadda, xonasidan ikki yarim million olib chiqibdi-da yosh ishchisini qo‘liga tutqazib debdi:
— Mana, to‘rt haftalik maoshingni ortig‘i bilan olgin-da, bu yerdan yo‘qol, qaytib kela ko‘rma!
Yigit pulni olib, indamasdan ketibdi. Rahbar esa bu holatni kuzatib turgan ishchilarga qarata:
— Kim edi u ishyoqmas?, - deb so‘rasa,
Ishchilardan biri:
— Pitssa tashish xizmatidan edi. Olib kelgan pitssasini pulini kutib turgandi, - degan ekan.

Buyurtmachi qurilish rahbariga:
— Uyimning devorlari juda-yam yupqa emasmi?
— Havotir olmang, hali devorlarga oboy yopishtirib chiqamiz!

— Uylanganimga o‘ttiz yil bo‘ldi. Faqat bir marttagina xotinim bilan fikrimiz bir joydan chiqqan.
— Qachon shunday bo‘ldi?
— Uyimizga o‘t tushganda bitta eshikdan qochib chiqqanmiz.

— Shanba kuni to‘yga borishim kerak. Lekin hecham borgim kelmayapti.
— Unday bo‘lsa borma.
— Bormasam bo‘lmaydi-da, kuyov o‘zimman!

Poyezdda ikki yo‘lovchi suhbatlashyapti:
— Mening xotinim farishta.
— Baxtli ekansiz, meniki haliyam tirik.

Tulki har doim ilonni mazah qilib, oyog‘i yo‘qligi uchun ustidan kulib yurarkan. Bir kuni tulki ilonni yoniga kelib:
— Endi yarashaylik, urishmasdan, do‘st bo‘lamiz. - debdi.
Ilon ham rozi bo‘lib turganakan, tulki:
— Yarashgan bo‘lsak, besh tashla, - degan ekan.

Xotin eriga:
— Kecha cho‘kayotganimda meni qutqarib qolgan odamni ko‘rdingizmi?, - desa,
— Ha, ko‘rdim. Kecha kelib mendan uzr so‘rab ketdi, - debdi eri.

<< < 59 60 61 62 63 64 65 > >>

Jami 2090 ta latifa mavjud

Tavsiya qilamiz

Bosh sahifa