Xizmatchilik-da, xizmatchilik (hajviya) [Anvar Obidjon]

Xizmatchilik-da, xizmatchilik (hajviya) [Anvar Obidjon]

Ishtahangiz Karnay Boʻlsin – Kechirasiz, bu kotletmi, yo... – Bifshteks. – Tushunarli. Nima, u tuxumsizmi? – Tuxumi bor edi. Uni hozirgina... – Tushunarli. Garniri noʻxatdan deng? – Yarmi makaron edi. Uniyam hozirgina... – Tushunarli. Noʻxatni yemabsiz, tuzi pastmi deyman? – Noʻxatni mana endi yeymiz... Menimcha, tuzi joyida. – Qiymachalpak-chi? Xoʻsh, nega uni sanchqiga ilmayapsiz? Bilaman, bilaman, u gʻirt chandir. – Menga qarang, sizga nima kerak oʻzi? – Kechirasiz, men... – Yetar-e! Qanaqa yogʻda qovurilganini bilmoqchi boʻlsangiz, ana, qolganini oʻzingiz yeb qoʻyaqoling. – Hoy, shoshmang. Shoshilmasangiz-chi, men... ovqatning sifatini bilmoqchiman, xolos. Xalq kontrolidanman! Favqulodda Majlis – Oʻrtoqlar, bugungi yigʻilishimizga shaxsan hurmatli Ali-hushtakning oʻzlari tashrif buyurganlar. Soʻz qadrdonimiz Ali-hushtakka! – Birodarlar! TAAS axborotchilari Yaqin Sharq va Afrika muguzidagi voqealarni keng sharhlab turishibdi. Xalqaro bozordagi vaziyat ancha jiddiy. Oʻzimizdagi ishlarga kelsak, vaziyat yanayam qaltisroq. Mundoq qaraganda, hammangiz oʻz oʻrningizda avvalgidek faollik koʻrsatib turibsiz. Lekin, tushum tobora kamayib ketyapti. Bu hol ayrim oʻrtoqlarning gʻirromchilik qilayotganidan dalolat beradi. Sizlarni bu yerga toʻplashdan maqsad, oʻz nafsidan boshqani oʻylamay qoʻygan ayrim oʻrtoqlarni ogohlantirib qoʻyishdir. Men hozir «bor, baraka» qilib, ularning otini tilga olib oʻtirmayman. Kimlar haqida gap ketayotganini oʻzlaring fahmlab turgan boʻlishlaring kerak... Bozorkom raisi shunday deya, oʻtirganlarga zimdan ma’nodor koʻz yugurtirib qoʻydi. Chayqovchilar tengdan choʻntak kovlay boshladilar. 1976

Muallif: Anvar Obidjon